Hautsak harrotu dituzte Santurtziko azken berriek. Udaltzaingoak Ander izeneko gazte bat hil du, taserrarekin tiro eginda koman utzi eta gero. Poliziaren gehiegikeriek bukaerarik ez dute eta inoiz baino urgenteagoa da haien inpunitateari amaiera jartzea.
Bingen Zupiria sailburuak dio Polizia instituzio gisa ezin dela zalantzan jarri. Eta adierazpen horiek egin zituen, hain justu, Hernaniko txosnetan ertzain bati ez zitzaiolako zerbitzatu. Tentuz erreparatzen badiogu, argi ikusiko dugu zein puntutaraino den totalitarioa Zupiriaren ikuspegia: ezin baditugu estatu-egiturak zalantzan jarri instituzioak ukiezinak omen direlako, akabo adierazpen-askatasuna eta kritikarako eskubidea. Zentzuzkoa dirudi ertzain bati, Poliziaren jarduna nolakoa den ikusita, txosnetan ez zerbitzatzea. Izan ere, ikus dezagun zein izan den Poliziaren ekinbidea azkenaldian: Flotillako kideak erreprimitu ditu, Amaia Zabarte, Xuhar Pazos, Iker Arana edo Aritz Ibarra golpatu eta mutilatu ditu, herri-mugimenduaren aurkako dozenaka jazarpen eta errepresio ekintza gauzatu ditu, etxegabetzeak burutu ditu, faxistak babestu ditu, eta orain, Santurtziko Udaltzaingoak gazte bat erail du.
Hori guztia eta gero, EAJko buruzagiari bururatzen zaion bakarra da Hernaniko gazteen aurkako eskandalu publiko bat muntatzea, zergatik eta Ertzaintzaren inpunitatea ezbaian jartzen duen ekintza ñimiño bat gauzatzeagatik; txosnetan ez zerbitzatzeagatik, hain zuzen ere. Bide batez, ohartarazpen bat merezi du EH Bilduk ere, Txosna Batzordearen erabakiaren (ertzainari ez zerbitzatzea) aurka jo baitzuen, zuzenean Ertzaintzarekin lerratuta. Instituzio burgesen eta herri-mugimenduaren arteko antagonismo argi bat gertatu da Hernanin, eta EH Bildu lehenengoarekin lerratu da bigarrenen aurka eginda. Horrek guztiak zer pentsatua eman beharko lioke bati baino gehiagori.
Anderren senitartekoei eta lagunei doluminak adierazteko unea da. Inpunitate polizialarekin bukatzeko garaia da. Ez dugu Poliziaren zuriketarik onartuko, besteak beste, horrelako ezbeharrak gertatzen ari direnean. Gauza bat jakinekoa da: poliziek guztion gainetik daudela uste dutela. Arazo argi bat dago auzi honetan, eta ezin dugu beste alde batera begiratu. Borroka ideologikoa egiteari uko egiten badiogu, Poliziaren egiturazko arazoari buruz hitz egin beharrean eredu polizialari buruzko eztabaidaren tranpa irensten badugu, jai ederra dugu aurrerantzean.
