Atzo hasi zen Espainiako Poliziako lau agenteren aurkako epaiketa Bartzelonako Probintzia Auzitegian, duela bederatzi urte Roger Españoli begi bateko ikusmena galduarazi izana egotzita. 2017ko urriaren 1eko erreferendumean, gomazko pilota bat bota zion Poliziak Rogerri, begietako batean larriki zaurituz.
Ahozko bista hau da egun hartako kargengatik polizia-agenteen aurka irekitako auzi judizial bakarra, eta lau saio izango dira denera. Azkeneko saioak, gainera, gertaeren bederatzigarren urteurrenarekin bat egingo du. Egun horretarako, elkarretaratze batera deitu dute hainbat kolektibo independentistak, kaltetuari babesa emateko; Kataluniako hiriburuko Arc de Triomfen izango da kontzentrazioa.
Prozedurak inspektore nagusi bat, bi inspektoreorde eta eskopeta-agente bat eseri ditu aulkian. Omnium Culturalek egindako akusazioak hamahiru urteko espetxe-zigorra eta inhabilitazioa eskatzen ditu: biktimari organo nagusi bat galtzea eragin zion lesio-delitu bat leporatzen diete akusatuei, tortura-delitu batekin batera. Bestalde, Assemblea Nacional Catalanak hamabi urteko kartzela-zigorra eskatu du, eta Irídia plataformak, berriz, hamahiru urteko zigor konbinatua.
Akusazioaren idazkien arabera, 2017ko urriaren 1ean gomazko hamazazpi bala eta 48 salba erabiltzeko baimena eman zuten polizia-buruek, arauz ezarrita dauden baldintzak betetzen ez ziren arren. Akusazioen esanetan, agente eskopetariak bere ile zuriagatik identifikatu zuen Español, aurrez izandako liskar bat zela-eta, eta hiru aldiz egin zuen tiro bere kontra, 14,2 metroko distantziara. Arauz kontrakotzat jotzen da berez distantzia hori, eta "kaltea eragiteko borondate tematiarekin" aritu zen agentea, akusazioen hitzetan. Aurpegian jo zuen Roger, modu baketsuan manifestatzen ari zen momentu batean. Aipatutako erakundeen arabera, trauma horrek kalte psikologiko larriak eragin dizkio biktimari, eta musikari gisa zuen lanbidea utzi behar izan zuen.
Kontrako muturrean, fiskaltzak lau funtzionarioen absoluzioa eskatu du, euren "eginbeharrak" egun hartako jarduna "babesten" duelakoan. Ministerio Publikoaren idazkiak dio gertakariak Ramon Llull zentroan esku hartu ondoren jazo zirela, 600 eta 800 pertsona inguruk Sardenya eta Diputació kaleen arteko bidegurutzea 45 minutuz blokeatu zutenean, polizia-furgoiei pasatzea galaraziz. Fiskaltzak argudiatu duenez, "bitartekotza egiten saiatu" eta megafoniaz "sakabanatzeko" agindua eman ostean, "hesiak eta galtzada-harriak jaurti" zizkieten agenteei.
