Murrizketek jarraitzen dute; izan ere, azkenaldian, osasun-sektorearen joera nagusia da adabakiak ahalik eta modurik lotsagabeenean jartzea kolapso progresiboari. Alberto Martinez Eusko Jaurlaritzako Osasun sailburuari ideia bikaina bururatu zaio oraingoan: Familia eta Komunitateko Medikuntzako espezialitateko prestakuntza lau urtetik hirura murriztea, osasun-sisteman sartzen diren medikuen kopurua handitzeko plan burutsu batekin.

Biztanleen beharrei erantzun ahal izateko, langile faltari irtenbidea aurkitu beharrean, lehendik dauden baliabideak berrantolatuko ditu sailburuak. Moldeatu edo izenez aldatzen ditu, gero eta gaixoago eta zahartuago dagoen biztanleriaren osasun-eskaerei nekez erantzuten dioten baliabide dekadenteak arintzeko. Horrela, murrizketak edo baliabide falta kulturalki normalizatzea espero dute, oraingoan, familia-medikuntzako espezialisten prestakuntza urtebete murriztea onar dezagun eta aurrekari bat sor dadin; prestakuntzan, plantillan edo baliabideetan murrizketak egin ahal izateko, etorkizunean.

Beharbada, Martinez jauna, pazienteek behar dutena alderdi guztietan hobeto prestatuta egongo diren mediku gehiago dira. Beharbada, Martinez jauna, instituzioek eta sozialdemokraziak duten ezintasunaz hitz egin beharko genuke, interes ekonomikoen aurka, herritarren beharren arabera egokitutako osasun unibertsala, doakoa eta kalitatezkoa bermatzeko orduan. Beharbada, Martinez jauna, bai pazienteak bai osasun-langileak modu independentean antolatu beharko ginateke, osasungintzaren desegitearen aurka.