Hirugarren graduan zegoen 45 urteko gizon batek aurreko astean eraso zion 16 urteko gazte bati, Zabalgana gizarte-etxean.
Eduki sexualeko gutun bat, jarraipenak, keinu lizunak, komentarioak... 16 urteko adingabe batek hori guztia jasan behar izan zuen aurreko astean Gasteizko (Araba) Zabalgana gizarte-etxean, 45 urteko gizon baten partetik. Izan ere, erasotzailea horrela saiatu zen gaztea behartzen, bi egunez jarraian. Gizonezkoa Zaballan dago preso, eta hirugarren graduan zegoen une horretan; dozena bat pertsonari sexu-erasoak egiteagatik daukate gatibu, nagusiki adin txikikoak eta adimen urritasuna dutenak, antza.
Zabalganan gertatutakoa salatzeko, mobilizatzera dei egin zuen Gasteizko Itaia Emakumeon Antolakunde Sozialistak, Zabalgana Batuz Auzo Elkartearen eskutik. Atzo egin zuten protesta, arratsaldeko 19:00etan, gizarte-etxean bertan: Eraso ororen aurka borrokatu! izan zuten aldarri. Antolatzaileek ezinbestekotzat jo zuten eraso matxistei erantzutea, aldarrikatuz "guztion ardura" dela "erasoen aurkako erantzun irmoak ematea".
