ACTUALIDAD
Ostegunetik ostiralerako gauean, eraso homofobo bat jasan zuten bi gizonek Iruñeko Alde Zaharrean, Tejeria eta Estafeta kaleen bidegurutzean hain zuzen ere: 19 urteko bikote bati bortizki eraso zioten hainbat gizonezkok.
Lagun batekin zegoen kalean bikotea, eta janari-saltoki baten inguruan galdezka hurbildu zen haiengana gizonezko talde bat. Galdekatutako pertsonetako batek hitz egin zuenean, "Marikoiak zarete edo zer?" erantzun zieten taldetik, eta berehala egin zieten eraso fisikoki. Ukabilkadak jo zizkieten, eta biktimetako bat konorterik gabe utzi zuten; lurrera jausi zen. Jarraian egin zuten ihes erasotzaileek.
Handik ordu batzuetara atxilotu zuten haietako bat; 20 urte ditu, antza denez. Zabalik dago ikerketa oraindik, eta lesio-delituez gain, gorroto-delitu posible bat dago mahai gainean.
