Joan diren hilabeteetan, milioika liburu kendu dituzte Ukrainako autoritateek euren eskumeneko liburutegietatik, eta ez dute zehaztu zer egin duten horiekin. Reuters atariaren arabera, 19 milioi liburu erretiratu dituzte; zehazki, "garai sobietarrekoak" direnak edota errusiarrez daudenak. Horretarako, hizkuntzari lotutako argudioak erabili dituzte nagusiki. Ukrainako Parlamentuko Politika Humanitarioko eta Informazioko Batzordeko zuzendariordeak, Yevheniya Kravchuk-ek, azpimarratu du "tamalgarria" dela Ukrainako liburutegietan "errusieraz eta ukraineraz dauden liburuen proportzioa", %44 direlako errusieraz idatzitakoak.

2019an Kieveko Nazioarteko Soziologia Institutuak egindako inkesta baten arabera, biztanleen erdiak hitz egiten du soilik edo nagusiki ukraineraz, eta %30ek errusieraz. Dena den, gaur-gaurkoz ukrainera da hizkuntza ofizial bakarra Ukrainan.

Milioika libururen zentsurari dagokionez, zenbait datu eman ditu Kravchuk-ek: baztertutako 19 milioi liburuetatik, 11 milioi ziren errusiarrez idatzitakoak. Badirudi, beraz, arrazoiak ez direla soilik hizkuntzari lotutakoak. Ukrainerazko milioika liburu ere erretiratu dituzte liburutegietatik; esan bezala, "garai sobietarrekoak" direnak, Kravchuk-en esanetan. Antza, "Ukrainaren kontrako eraso armatua babestu" duten autoreen liburuak deuseztatzeko proposamenak ere mahai gainean daude.

Reuters-ek gogorarazi duenez, Ukrainako Gobernuak 2014an ekin zien errusierazko liburuak murrizteko politikei, Ukrainaren eta Errusiaren arteko "lotura kulturalak are gehiago hausteko". Duela urtebete, baina, gerra lehertzearekin batera, areagotu egin zuen prozesu hori.