Itaiak hamaika herritan egin ditu Etxeratze Kolektiboak udan zehar, "erasoen aurrean erantzun eraginkorrak" emateko asmoz.
Itaia Emakumeon Antolakunde Sozialistak aurten jarri ditu martxan Etxeratze Kolektiboak, Euskal Herriko hainbat eta hainbat jaietan. "Emakume
langileok gure segurtasuna bermatzeko eta erasoen aurrean erantzun
eraginkorrak gauzatzeko tresna propioak garatzea behar-beharrezkoa da", azpimarratu izan dute Itaiako kideek. Helburu horrekin lotu dituzte, besteak beste, Etxeratze Kolektiboak, indarkeria matxistari erantzuteko hainbat festetan antolatutako protokoloak edota askotariko prebentzio mekanismoak.
Udan zehar, hamaika txokotan antolatu dituzte Etxeratze Kolektiboak lekuan lekuko Itaiako taldeek. Esaterako, Lekeition (Bizkaia), Ondarroan (Bizkaia), Mutrikun (Bizkaia), Elorrion (Bizkaia), Errekalden (Bilbo, Bizkaia), Deustun (Bilbo, Bizkaia), Bakion (Bizkaia), Lezaman (Bizkaia), Altsasun (Nafarroa), Lizarran (Nafarroa), Garesen (Nafarroa), Txantrean (Iruñerria, Nafarroa), Errotxapean (Iruñerria, Nafarroa), Barañainen (Iruñerria, Nafarroa), Berriozarren (Iruñerria, Nafarroa), Burlatan (Iruñerria, Nafarroa), Gasteizen (Araba), Ordizian (Gipuzkoa), Legazpin (Gipuzkoa) nahiz Urretxu-Zumarragan (Gipuzkoa) egin dituzte Etxeratze Kolektiboak azken hilabeteetan, "indarkeria matxistaren aurrean antolatzera" dei eginez.
Datozen egunetan, Galdakaoko (Bizkaia) festetan ere izango dira Etxeratze Kolektiboak. Hilaren 9rako, 10erako, 16rako eta 17rako prestatu ditu Etxeratze Kolektiboak Hego Uribeko Itaiak; 02:00etarako eta 05:00etarako jarri dituzte hitzorduak Errotu konpartsaren ondoan.
