Zamudioko Pine Equipos Electricos lantegiko beharginek grebara jo dute

Zuzendaritzak aurkeztutako enplegu-erregulazioko espedienteari aurre egitea eta kaleratzeak geldiaraztea dute helburu langileek. Patronalak 60 langiletik 40 kaleratzeko asmoa iragarri du, "egoera koiunturala" argudiatuta. Beharginek lau orduko lanuzteak eta mobilizazioak egingo dituzte bi astez.
Argazki Nagusia
Argazkia: ELA
2021eko uztailaren 7a

Gaur, hilaren 7an, lanuzteak hasi dituzte Zamudioko (Bizkaia) Pine Equipos Electricos enpresako langileek. Bi aste iraungo duen grebari ekin diote, zuzendaritzak aurkeztutako enplegu-erregulazioko espedientea eta kaleratzeak  geldiarazteko asmoz. Zuzendaritzak 60 langiletik 40 kaleratzeko asmoa du, pandemian ohikoa izan den aitzakia baliatuta: "egoera koiunturaleko zailtasunak".


Soldatapekoek, ordea, ez dute argudio hori onartzen; koiuntura "kaleratzeak egiteko erabiltzea" leporatzen diote patronalari. Gauzak horrela, "bestelako aterabideak negoziatzea" aldarrikatu dute. Bilboko (Bizkaia) Iberdrola dorrearen aurrean elkarretaratu dira gaurkoan.


Iruzkinak

Ez dago iruzkinik