Unibertsitatearen errepresio polizialaren aurkako ikasle mobilizazioak, unibertsitateak polizia deitu, ikasleak atxiki. Unibertsitatean, jardun politikorako ukazioa, ikasleen erresistentzia, poliziak teilatu gainetik, isunak. Antolakuntza politikorako espazioen defentsa, poliziari deia, indar poliziala teilatupean, identifikazioak; isun gehiago. Erreformak eta ikasle greba, lege berriak eta polizia gehiago, 34 atxilotu. Polizia Hernaniko institutuan, polizia Usandizaga institutuan, polizia Altsasuko institutuan.
Hezkuntza sistema eta polizia, hezkuntza sistema poliziala.
2 urtetan 2 milioi euro igo den EHUko segurtasun indarren aurrekontua. Campusean, kafetegian, fakultatean: seguratak. Lehen bi begi zeuden lekuan lau, eta hamaika nini gehiago paretetan itsatsita. Kontrol plataformak ikastetxean. Begi-niniak digitalizazioaren atzean. Ebaluazio bakoitzaren emaitza sarean. Ezarritako ordena penitentziarioa auzitan jartzean, notifikazioak. Paperezko hegazkin bat, zigor bat. Berandutzeak, dei bat. Komunera buelta bat fitxatu gabe, bibrazio bat gurasoen sakelakoan. Gela-pasa bat, abisu bat; kartel bat, mezu bat; asanblada bat, parte bat; kontzentra bat, kanporatu bat; eserialdi bat, bi kanporatu.
Irteera profila bikaina da, erraza da-eta iruzurra. Askatasun ezari askatasun izena jarri zaio. Deshumanizazioari, garapen kognitiboa edo gaitasun kognitiboen eskurapena esaten zaio.
Gizarte kapitalistaren eta ordena sozialaren erreprodukziorako tresna paregabea dugu egun hezkuntza. Miserian eta miseriarako hezitzaile. Horretara kondenatzen gaituen eta egungoa erreproduzitu besterik egiten ez duen tresna suntsituz eraikitzen da hezkuntza sistema sozialista. Antolakuntza politikoa hedatuz eraikitzen da sistema sozialista, bera baita ukatua zaigun heziketa politikoaren premisa, egungo hezkuntza sistemak eraikitzen duen kontzientzia faltsuari aurre egiteko baldintza eta jazarpen polizialaren eta errepresioaren aurrean indartsu mantentzeko arma.
Ez ditugu motibazio abstraktutik motiboak aterako; motiboetatik motibaziorako urratsa eman nahi dugu.
