Atzo, hilak 15, Parisko Zigorrak Ezartzeko Auzitegiak atzera bota zuen Lorentxa Beirie preso politikoa baldintzapean aske uzteko eskaera. 18 urte darama espetxean Beirie lapurtarrak, eta baldintzapeko askatasuna lortzeko hiru eskaera aurkeztu ditu dagoeneko. Uztailaren 19an egin zuen azkeneko saiakera, eta Parisko Auzitegiak onartu egin zuen, bere mugimenduak mugatuko lituzkeen eskumuturreko elektronikoa eramateko baldintzarekin. Fiskaltzak, ordea, erabaki horren aurkako helegitea aurkeztu zuen berehala, eta atzo bertan izan zen onartua. Hala, preso jarraitu beharko du Beiriek.

Auzitegiak preso politikoaren "damu eza" argudiatu du baldintzapeko askatasuna ukatzeko. Helegitea aurkezterako orduan, fiskaltzak azpimarratu zuen egotzi dizkioten delituak berriz egiteko arriskua zuela Beiriek.

Xistor Haranburu, egoera berdinean

Gaur gaurkoz, egoera berdinean daude Lorentxa Beirie eta Xistor Haranburu preso politikoak. Haranbururi ere baldintzapeko askatasuna ukatu dio auzitegiak, bigarrenez. 30 urte darama atxilo.

Berria-k jakinarazi duenez, preso gehiagoren egoerak aztertuko dituzte aurki Parisen. Urriaren 23an Zigor Garroren baldintzapeko askatasuna aterako dute mahaira, eta urriaren 30ean, Ibon Fernandez Iradiren aurkako zigorra etetea aztertuko dute. Gaixo dago Fernandez Iradi. Bestetik, atzeratu egin dute Josu Urrutikoetxea Espainiaratzeko bi eskaeren inguruko ebazpena.