Udan zehar ere mobilizatzen segitzen du Palestinarekin Elkartasuna plataformak. Palestinako erresistentziaren alde eta Israelgo Estatu genozidaren kontra, manifestazioak izan dira Euskal Herriko zenbait hiriburutan; hala nola, Gasteizen (Araba) Andre Mari Zuriaren jaietan eta Iruñean (Nafarroa) San Fermin festetan. Gainera, hainbat herritan atera dituzte Palestinaren askatasuna aldarrikatzeko elkartasun-argazkiak, lekuan lekuko jaiak aitzakiatzat hartuta.

Datozen egunetarako ere egin ditu zenbait deialdi Palestinarekin Elkartasunak. Gaur, ostiralez, Bilbon (Bizkaia) mobilizatuko dira: hainbat konpartsakideren babesarekin, manifestazio bat izango da arratsaldean. 19:00etan hasiko da, Eliptikatik.

Donostian (Gipuzkoa), bestalde, Aste Nagusia ari dira ospatzen azken egunetan, eta hori probestuko dute beste mobilizazio bat egiteko. Bihar, larunbatez, Bulebarretik ekingo diote manifestazio bati, arratsaldeko 18:30ean.