Astebete eskas geratzen da urtarrilaren 25erako. Egun horretan mobilizatzera deitu du Gazte Koordinadora Sozialistak (GKS), gerra-mehatxuaren kontra eta faxismoaren gorakadaren kontra. Bilbon (Bizkaia) eta Iruñean (Nafarroa) antolatu ditu manifestazioak.
Ikasle Abertzaleak antolakundeak bat egin du deialdiarekin, eta asteak daramatza ikastetxeetan eta campusetan mobilizatzeko deia zabaltzen. IAko kideek aurkezpenak egin dituzte hezkuntza-zentroetan, GKSk deitutako manifestazioen nondik norakoak azaltzeko. Nabarmendu dute beharrezkoa dela kalera ateratzea, "Euskal Herrian agenda belizista eta faxismoa normalizatu ez daitezen".
