Kelvion Thermal Solutions enpresak Igorren (Bizkaia) duen plantako langileek greba mugagabea egingo dute azaroaren 15etik aurrera. Joan den ostiralean batzarrean elkartu ostean, langileek uko egin diote lantegiaren itxierari. Enpresako zuzendaritzak berriki adierazi du fabrika zarratzeko eta 73 langile kaleratzeko asmoa duela, enplegu erregulazioko espediente baten bidez.

Langileek gaur jakinarazi dute greba mugagabeari helduko diotela, zuzendaritzak hartu nahi dituen neurriak atzera botatzea eta elkarrizketa prozesu bat irekitzea exijitzeko. Aste honetan zehar emango dute egingo dituzten mobilizazioen berri.