Espainiako Estatuan, etxebizitzaren krisia da oraindik ere biztanleriaren kezka nagusietako bat, batez ere langileriarentzat. Astelehen honetan El País egunkarian argitaratutako txosten baten arabera, erosketa- eta alokairu-prezioek gora egiten jarraituko dute 2025ean, "etxebizitza-eskasiagatik eta gora egiten jarraitzen duen eskariagatik". Prezioen igoera 2024tik apur bat moteldu daitekeen arren, aurreikuspenen arabera, inflazioa gaindituko duten igoerak izango dira. Etxebizitza eskuragarrien eskaintzarik eza da egoera larriagotzen duen faktore nagusietako bat.

Azken hamarkadan, Espainiako Estatuko etxebizitzen prezioak %56 inguru igo dira. 2014an erregistratutako mailarik baxuenetatik, etenik gabe igo dira prezioak azken hamar urteetan, Bankinterren datuen arabera. 2024an, higiezinen merkatuak goranzko joera izan du, bai salerosketetan bai prezioetan, batez ere obra berrien sektorean. Hazkunde hori 2025ean mantentzea espero da.

Adituek aurreratu dutenez, 2025. urtea "transakzio handiko eta prezio altuko urtea izango da". Joan Carlos Amaro irakasleak El País egunkarian azpimarratu du eskariak "indartsu jarraituko" duela, eta hori prezioetan eta herritarren arteko ezinegon orokorrean islatuko da. Bestalde, Europako Banku Zentralak interes-tasak murriztu izanak hipoteken eskaera suspertzea ekarri du, eta horrek salerosketak berriro handitzea eragin dezake. Higiezinen atarien arabera, prezioen igoera %8tik gorakoa izan daiteke zenbait gunetan, eta %10era ere hel daiteke Madrilgo eta Valentziako merkatuetan.

2025erako aurreikuspenak neurrizko hazkunde bat espero du salerosketetan, %2 eta %5 artekoa, antza denez, eskaintzarik ez dagoelako eta biztanle askok etxebizitza eskuratzeko zailtasunak dituztelako, prezio garestiak direla eta. Etxebizitza eskuragarrien eskaintza handiago baten beharra premiazkoa da: Espainiako Estatuak 600.000 etxebizitza inguruko defizitari aurre egin behar dio, bereziki lan eta migrazio eskaririk handienak dituzten hirietan. Espainiako Bankuaren arabera, defizit hori milioi bat etxebizitzakoa izan daiteke 2026an.

Bestalde, badirudi alokairua dela etxebizitzaren krisiak gehien kaltetutako alderdia. Merkatuko eskaria lepo egonik eta eskaintza hain eskasa izanik, alokairu-prezioek igotzen jarraituko dute. Aurreikuspenek diote errentak %10era arte igoko direla Espainiako Estatuko zenbait hiri handitan. Hala, etxebizitza erabilgarrien faltak eta alokairuen kostu altuak milaka langile-familiari eragiten jarraituko dute, batez ere eskaririk altuenak dituzten hiriguneetan. Amaroren esanetan, "eskuragarri dauden eraikin urrien lehia izugarria izango da", eta maizterrentzat are zailagoa izango da bizitzeko toki eskuragarri bat aurkitzea.