"Atzoko faxismoaren ikurrak eraitsi eta gaurko faxismoaren aurka egin behar dugula aldarrikatzeko" eskegi dira, eta GKSk bihar Iruñean eta Bilbon egingo dituen manifestazioetara batzera deitu dute.
Gaur goizean, Iruñeko (Nafarroa) monumentu frankista nagusian zintzilikatu dira bi pertsona, Faxismoa borrokatu eta U31 Iruñera mezuekin. Ekintza horrekin, "atzoko faxismoaren ikurrak eraitsi" behar direla erreibindikatu dute, Erorien Monumentua kasu; eta "gaurko faxismoaren aurka egin behar dugula" ere azaldu dute.
Iruñeko Udaltzaingoak eta Espainiako Poliziak, elkarlanean, 09:00ak igarota itxi dute eremua, eta mehatxu egin diete ekintzaileei: jaisten ez badira, atxilo eramango dituztela esan diete. Udaltzainek Erorien Monumentuko ateak ireki dituzte gero, eta barrura sartu dira bai poliziak bai suhiltzaileak. Bertan daude une honetan.
Faxismoaren kontra borroka egitera deitzeaz gain, Gazte Koordinadora Sozialistak (GKS) biharko antolatu dituen mobilizazioetara batzeko deia zabaldu dute eskegi diren bi lagunek. Iruñean eta Bilbon (Bizkaia) izango dira manifestazio horiek, faxismoaren eta estatuen autoritarismoaren aurka: Erorien Monumentutik bertatik hasiko da Iruñekoa, 18:30ean, eta Jesusen Bihotzetik Bilbokoa, ordu-erdi lehenago.
[Albistea eguneratzen ari gara]
