Eraikin osoan zehar egin dituzte margoketa faxistak. Erasoa salatzeko, protesta bat antolatu dute larunbaterako.
"Defend Europa", "Anti-Antifa", "Stop LGTBI", "Guerra sin cuartel", eta abar. Irungo (Gipuzkoa) Lakaxita Gaztetxeak jasandako eraso faxistan, horiek izan dira eraikin osoan zehar egin dituzten pintaketetako batzuk, "harrotasun zuria" aldarrikatzeko erabiltzen den sinbolo nazia margotzeaz gain.
Lakaxitako kideek jakinarazi dutenez, margoketak kendu dituzte jadanik. Erasoa salatzeko, kontzentrazio bat antolatu dute larunbat honetarako, hilaren 21erako. 13:00etan izango da, Moskun. "Ozen esan nahi dugu faxismoari erantzun egingo diogula, aurrean gaudela eta antolatuta", gaineratu dute.
Ez da eskualde berean, denbora oso gutxian, ezabatu behar izan duten mezu faxista bakarra. Duela hilabete eskas, Hondarribian (Gipuzkoa) agertu zen mural faxista handi bat: "Europa babestu" idatzi zuten portuan. Margoketaren gainean, "Faxismoa borrokatu" jarri zuen Bidasoko Gazte Koordinadora Sozialistak (GKS).
