Gaur, hilak 6, IMQ-ren hainbat zentrotan elkarretaratzeak egin dituzte osasun-langileek, hala nola, Bilboko (Bizkaia) Zorrotzaurre eta Andre Maria Zuria kliniketan. Izan ere, iragan larunbatean haien lankide bat zendu zen Gurutzetako Ospitalean (Bilbo, Bizkaia), Covid-19 birusak jota. Gestlab, Zorrotzaurreko IMQ, Andre Maria Zuria, IMQ Erradiologia eta Gizatze zentroetako langileen batzordeek egin dute bat gaurko protestarekin, eta erailketa salatzearekin batera, babeserako neurri falta salatu dute.

Batzordeek, hala, "arduraz jokatzeko" eskatu diete IMQ taldeari nahiz Zorrotzaurreko eta Andre Maria Zuriko zuzendaritzei, langileen segurtasuna eta babesa berma ditzaten. Izan ere, azaldu dute egun indarrean dauden prebentziorako eta babeserako neurri indibidualak ez direla nahikoak.

Espainiako Gobernuak alarma egoera ezarri eta hogei egunera koronabirusa zuten hainbat pertsona mugitu zituzten IMQ zentroetara, Osakidetzatik. Hala ere, osasun-langile batzuei oraindik ez dizkiete testak egin. Osasungintza-arloko sektore guztietako beharginak kontuan hartzeko eskatu dute langileen batzordeetako kideek.

Salbuespen egoera hasi zenetik, gutxienez, bi osasun-langile erail dituzte Euskal Herrian. Aurreko asteko hilketaren aurretik, martxoaren 19an zendu zen Osakidetzako erizain bat Basurtuko Ospitalean (Bizkaia), Covid-19aren eraginez.