Donostiako Infernuko 'Fabrika' pabiloia hustu dute polizia-indarrek

Actualidad / DESAHUCIOS

50 pertsona etxegabetu dituzte Donostiako Infernuan. Ertzainak nahiz udaltzaingoak bertaratu dira auzunera, eta 'Fabrika' pabiloiko hiru solairu hustu dituzte.

Atzo arratsaldeko irudi bat. Argazkia: Infernua Bizirik

2020/11/05 09:53

Donostiako (Gipuzkoa) Infernuko bizilagunek atzo arratsalderako espero zuten polizia-operazioa, eta azkenean, gaur goizean ekin diote desalojoari polizia-indarrek: ertzain batzuek gau osoa eman dute auzunean, eta goizean goiz bertaratu dira ertzain gehiago nahiz udaltzainak. Ertzaintzak hasieran adierazi badu ere Infernuko hiru pabiloi husteko agindua zutela, beranduago jakinarazi dute Fabrika pabiloiko hiru solairu desalojatuko zituztela.

100 pertsona inguru bizi dira auzunean birjabetutako eraikinetan, eta Fabrika hustuta, kale gorrian utzi dituzte horietako 50, alarma egoera bete-betean. Bizilagunek adierazi dute ez dutela jakinarazpenik jaso aurretik, eta legez kanpokoa izan dela desalojoa.