Nazio Batuen Erakundeko Segurtasun Kontseiluak atzo onartu zuen ebazpen bat, Iranek egindako "eraso lazgarriak" gaitzesteko: Bahrein, Kuwait, Oman, Qatar, Saudi Arabia, Arabiar Emirerri Batuak eta Jordaniako lurretan dauden base estatubatuarren aurka izan dira seinalatutako eraso horiek. NBEk, ordea, ez du aipatu ere egin Amerikako Estatu Batuek eta Israelek otsailaren amaieran Iranen aurka hasitako oldarraldi militarra, gaur egungo gatazka armatua eragin zuena. Bahreinek "erasotutako herrialdeen" izenean aurkeztutako dokumentuak organoko hamabost kideetatik hamahiruren babesa jaso zuen; ez zen kontrako botorik egon, eta Txina eta Errusia abstenitu egin ziren. Aurretik, 135 herrialdek babestu zuten Errepublika Islamikoari "berehala eta baldintzarik gabe inguruko estatuen aurkako probokazio edo mehatxu oro amaitzeko" eskatzen dion adierazpena; besteak beste, AEBek, Israelek, Erresuma Batuak, Frantziak eta Espainiak.
Bilera berean, Segurtasun Kontseiluak atzera bota zuen Errusiak proposatutako ebazpen alternatibo bat, "alde guztiei" eskatzen ziena "berehala utz ditzatela bertan behera jarduera militarrak" eta "uko egin diezaiotela Ekialde Hurbilean eta harantzago eskalada handitzeari". Ebazpen horrek ez zuen herrialde bat bera ere aipatzen erasotzaile gisa. Errusiaren testuak aldeko lau boto, AEBen eta Letoniaren betoa eta bederatzi abstentzio jaso zituen. Errusiako enbaxadore Vasili Nebenziak "partzialtzat" jo zuen onartutako ebazpena, eta "kausa eta efektua nahasten" dituela salatu zuen: "Nazioarteko gaietan ongi hezia ez den norbaitek hau irakurtzen badu, Teheranek, bere borondatez eta maltzurkeriaz, eraso ez-probokatuak egin zituela pentsatuko du. Badirudi Minabeko neskatilen eskolaren aurkako eraso lazgarria ez zela gertatu".
Txinako enbaxadore Fu Congek bere herrialdearen abstentzioa defendatu zuen, testua orekatua ez dela iritzita eta gatazka AEBek eta Israelek hasi zutela gogoraraziz, "Segurtasun Kontseiluaren baimenik gabe eta negoziazioen erdian". Txinako ordezkariaren hitzetan, "gatazka honek ez du zilegitasunik, ezta oinarri legalik ere", eta ohartarazi zuen gerraren luzapena "Ekialde Ertain osoa amildegi arriskutsu batera bultzatzeko mehatxu" bat dela. Bestalde, Amir Saeid Iravani Irango enbaxadoreak salatu zuen ebazpena "bidegabekeria nabarmena" dela bere herrialdearen aurka, "eraso-ekintza argi baten biktima nagusia" delako; eta seinalatu zuen "inpunitatea ezartzen" duela eta "erasotzaileak krimen gehiago egitera bultzatzen dituela".
Iranek Golkoko herrialdeetan egindako errepresalia-bonbardaketak erantzun bat izan ziren AEBek eta Israelek elkarrekin egindako erasoari. Iranek NBEren aurrean aurkeztutako datuen arabera, 1.332 irandar zibil erail dituzte herrialdeko 636 lekutan, Tomahawk misil estatubatuar batek harrapatutako Minabeko eskola bateko 168 neskatoak eta hamalau helduak barne. Pentagonoaren aurretiazko ikerketa batek eta adituek, dena den, kontzienteki egindako gerra-krimentzat jo dute erasoa.
NBEko Segurtasun Kontseiluak, hala ere, ez du biktima horiei buruzko aipamenik egin bere ebazpenean, eta Iranek "zibilen eta azpiegitura zibil kritikoen aurka nahita egindako erasoa" gaitzetsi zuen. "Ormuzko itsasartean zehar nazioarteko nabigazioa ixtea, oztopatzea edo zailtzea" helburu duen edozein ekintza ere kondenatu zuen. Mike Waltz AEBetako enbaxadoreak (Kontseiluko txandakako presidentetza du) ebazpena onartu izana txalotu zuen, eta esan zuen "Trumpek eta bere taldeak Iranekin negoziazio diplomatikoak egiteko ahalegin guztiak agortu" zituztela.
