Aurten ere Leioako campusak hartuko du Herri Unibertsitate nazionala, otsailaren 26tik eta 27ra bitartean. Bi egunez izango dira hitzaldi, mahai-inguru eta jarduerak, eta besteak beste, bertan izango dira Isabel Benitez, Itaia Emakume Sozialisten Sareko kideak, Herrialde Katalanetako SEPC ikasle sindikatuko kideak, Iruñerriko Langileen Autodefentsa Sareko kideak edota Jose Maria Lorenzo Espinosa. Ostegun gauean jaialdia egingo dute Bilboko Etxarri II gaztetxean, eta Rodeo eta Huntza taldeek eskainiko dituzte kontzertuak.
Iaz ere Leioan egin zuten Herri Unibertsitate nazionala. Argazkia: HUnibertsitatea
Tokian tokiko Herri Unibertsitateak martxan diren honetan, aurtengo Herri Unibertsitate nazionala noiz eta non egingo den argitaratu du ikasle mugimenduak, baita egitaraua ere. Otsailaren 26tik 27ra bitartean izango da, Leioako (Bizkaia) campusean. Hala, aurten ere bi egunez hitzaldiak, mahai-inguruak eta bestelako jarduerak izango dituzte eskura Hego Euskal Herriko ikasleek, modu bateratuan.
Gonbidatuen artean Isabel Benitez eta Itaia Emakume Sozialisten Sareko kideak egongo dira, "emakume proletarioen subordinazio egoeraren" inguruan
hausnartzeko. Iruñerriko (Nafarroa) Langileen Autodefentsa Sareak, Herrialde Katalanetako SEPC ikasle sindikatuak eta Unibertsitateko Indar Batasunak ere hitza hartuko dute aurtengo Herri Unibertsitate Nazionalean, sindikalgintza forma berrien
inguruan aritzeko. Jose Maria Lorenzo Espinosa historialaria ere
bertan izango da, eta Espainiako Estatuko trantsizioak Euskal Herrian izan
zuen eraginaren inguruan mintzatuko da.
Egitaraua ixteko, jaialdia egingo dute Bilboko (Bizkaia) Etxarri II gaztetxean. Bertan, kontzertu bana eskainiko dute Huntza eta Rodeo taldeek.
