The Champions Burgerren aurka antolatzen ari dira Iruñerrian (Nafarroa). Duela astebete hasi zen jaialdi ibiltariaren bigarren edizioa Nafarroako hiriburuan, eta egun horretan bertan egin zuten auzo-batzar jendetsu bat Errotxapean, Iruñerriko Kontseilu Sozialistak eta Gazte Koordinadora Sozialistak (GKS) deituta, makroekimenaren kontra antolatzeko.

Horri lotuta, protesta deialdi bat egin dute gaur iluntzerako: 20:00etan jarri dute "hitzordu zaratatsua" Anelier pasealekuan, The Champions Burgerri ezetz esateko. Gainera, ostiral honetarako ere zabaldu dute deialdi bat, Boikot Champions Burger lelopean: mobilizazio bat antolatu dute, eta 20:00etan hasiko da Errotxapeko Maiteminduen Plazatik.

The Champions Burgerreko langileek jasan behar dituzten lan-baldintza penagarriak, bertan erreproduzitzen diren "aisialdi-eredu kapitalista" eta "prezio ordainezinak", espazio publikoaren pribatizazioa, osasungarritasun-baldintzen urraketa eta makroekimenaren babesleek Israelgo Estatuarekin dituzten loturak seinalatu zituzten Iruñerriko Kontseilu Sozialistak eta GKSk.