Osakidetzak iazko abenduan jarri zuen salaketa bat Juan Jose Quiñones Carriazoren aurka, aurreko bi urteetan EAEko osasun-sare publikoko segurtasun-burua izandakoaren aurka, eta postutik kendu zuen. Izan ere, jakin zen Quiñonesek, Ertzaintzako agente zela, unibertsitate-titulu faltsu bat aurkeztu zuela Osakidetzako segurtasun-zerbitzuko buru bihurtu ahal izateko.
Quiñonesek 2023an lortu zuen Osakidetzako segurtasunaz arduratzeko postua, eta bi urtez egon zen bertan, dokumentazioa faltsutu zuela jakin zenera arte. Handik zazpi hilabetera hainbat komunikabidek azaldu dutenez, ertzain ohia kondenatzea erabaki du Gasteizko epaitegi batek, esparru publikoko dokumentazioa faltsutzea leporatuta, baina zigor aski murritzarekin: 1.080 euroko isuna eta sei hilabeteko kartzela-zigorra. Epaileak espetxe-zigor hori eten du, gainera, bi urterako: epe horretan Quiñonesek ez badu beste deliturik egiten, ez du zigorra bete beharko.
Epaitegiak frogatutzat jo du segurtasun buru ohiak modu "kontziente eta borondatezkoan" aurkeztu zuela titulu faltsua, eta modu horretan lortu zuen agintaritza-postua 2023ko azaroan. Osakidetzako segurtasun buru postua urte horretan bertan sortu zuten, 2022an Basurtun (Bizkaia) umetxo bat bahitu ostean hala erabakita.
