Charlie Kirk komentarista eta aktibista, Turning Point USAren sortzaile gisa ezaguna dena eta MAGA mugimenduaren sustatzaile nagusietako bat izan dena, tiroz hil dute asteazken honetan Oremen, Utah Valley Unibertsitatean izandako ekitaldi publiko batean. Erasoa, bideoan jasoa eta 2.000 pertsona inguruk zuzenean ikusi zutena, Kirkek campuseko karpa baten azpian galderak erantzuten zituen bitartean gertatu zen. Agintaritzek baieztatu dute Timpanogos Regional ospitalean arreta medikoa jaso zuela, baina handik gutxira hil zela.

Unibertsitateak baieztatu egin du tiroketa, eta susmagarri bat atxilotu zutela esan du. Galdeketa egin ostean, baina, aske utzi dute, bere zuzeneko parte-hartzea bazterturik. FBIk eta tokiko Poliziak ikerketa zabalik dute oraindik, eta tiroaren egilea identifikatu nahian ari omen dira. Lehen informazioen arabera, "distantzia luzera" egin zuten tiro Kirken aurka, "ziurrenik teilatu batetik". 

Trumpek "ezker erradikalari" egotzi dio erasoa

Kirken heriotza dela-eta, izandako "galera izugarria" nabarmendu du Donald Trumpek, eta hildakoa "abertzale handia eta gazteriaren defendatzailea" zela aldarrikatu du. "Erantzuleak" aurkituko dituztela azaldu eta "ezker erradikalaren erretorikari" egotzi dio erasoa, gaineratuz "inor ez dagoela salbu" eta AEBetan "gerra politikoa" bizitzen ari direla.

Jack Posebic, Steve Bannon eta Jesse Watters bezalako ahotsek "inflexio-puntutzat" jo dute tiroketa, eta euren aurkari ideologikoei leporatu diete erantzukizuna.

Esklabotzaren eta Palestinako genozidioaren justifikazioa; homofobia; irakasleak seinalatzea, eta "armak eramateko eskubidearen" defentsa

MAGA mugimenduaren sektore gogorrenaren ordezkari gisa, Kirk ezaguna da bere ibilbide publikoagatik, sare sozialetan eta hedabide tradizionaletan adierazpen oso erreakzionarioak egin baitzituen. Paradoxikoki, argi eta garbi defendatu zuen "su-armek eragindako heriotzak, zoritxarrez, Bigarren Zuzenketa babesteko ordaintzea merezi duen prezioa" direla. Hala defendatu zuen 2023an Nashvilleko eskola batean izan zen tiroketaren ondoren.

Unibertsitateko elkarrizketa eta eztabaida ugari zuzendu zituen, pertsona migranteen eta LGBTQ+ kolektiboaren eskubideak zuzenean zalantzan jarriz, eta ikasleen eta irakasleen artean askotariko erantzunak eta zuzeneko liskarrak sortuz. Turning Point USAk, Kirkek sortu zuen erakundeak, "irakasleen kontrol-zerrenda" bat eratu zuen, "ikasle kontserbadoreak diskriminatzea" eta campusetan "ezkerreko propaganda sustatzea" egotzita. 

Hala ere, bere polemikarik handienetako bat izan zen hitzaldi batean adierazi izana "beltzak hobeto zeudela esklabotzaren eta azpiratzearen pean 40ko hamarkada baino lehen", esanez "gaiztoa eta makurra" izan zela esklabotza, "baina krimen gutxiago egiten zituztela". Hitz horiek sare sozialetan zabaldu eta nabarmendu zituen trumpismoak.

Kirkek, bestalde, bere plataformak erabili zituen Gazako genozidioa justifikatzeko eta palestinarren aurkako blokeoa defendatzeko, azpimarratuz "Gazan goserik ez dagoela". "Propaganda emozionaleko kanpaina" bat salatu zuen, helburua palestinarrak "biktimizatzea" zela iradokiz. 

Bere esanetan, "Israelek bonbardaketak egin baino lehen abisua ematen du, eskuorriak botatzen ditu eta korridore humanitarioak ezartzen ditu", eta bonbardaketak "legezkotzat" eta nazioarteko zuzenbidearekin bateragarritzat hartu zituen. Adierazpen horiek sionisten operazio kriminalak defendatzeko eta herri palestinarraren aurkako genozidioari buruzko narratiba negazionista bat sostengatzeko bozeramaile nagusietako bat bezala indartu zuten Kirk.