UIBk eta campusetako emakume-taldeek mobilizazioak antolatu dituzte Leioan, Gasteizen, Ibaetan, Eibarren, Iruñean eta Bilbon.
Aurten ere, Unibertsitateko Indar Batasunak (UIB) eta Euskal Herriko campusetako emakume-taldeek bat egingo dute indarkeria matxistaren kontra. Azaroaren 25erako, Indarkeria Matxistaren Aurkako Egunerako, mobilizazio-deialdi bat egin dute elkarrekin, Indarkeria matxistaren aurka kaleak hartu aldarritzat hartuta.
Sei campusetan antolatu dituzte protestak, hain zuzen ere, Bilbon (Bizkaia), Eibarren (Gipuzkoa), Gasteizen (Araba), Ibaetan (Donostia, Gipuzkoa), Iruñean (Nafarroa) eta Leioan (Bizkaia). Goizean izango dira mobilizazio guztiak: 10:30ean Gasteizen, Elurretatik hasita; 11:00etan Ibaetan (Aulariopetik abiatuta), Eibarren (unibertsitateko sarreran) eta Bilbon (San Mamesen); 11:30ean Leioan, Mikel Laboa Plazatik hasita; eta 11:45ean Iruñekoa, Nafarroako Unibertsitate Publikoko (NUP) Liburutegi Plazan.
Aurreko urteetan bezala, UIBk eta emakume-taldeek batu dituzte indarrak Azaroaren 25erako; hala nola, NUPeko Saretuk, Eibarko Sukadak, Gasteizko Unibertsitateko Emakume Taldeak (GUET), Leioako Lorratzek, Ibaetako Arrakalak eta Bilbouniko Emakume Taldeen Koordinadorak. "Azaroaren 25ean kaleak hartzeko dei egiten dugu, matxismoa normalizatzen duten ideia eta erasotzaileen inpunitatearen aurka", azaldu dute.
