Espainiako Auzitegi Nazionalak absolbitu egin ditu Garikoitz Aspiazu eta Asier Arzalluz. Hilaren 4an hasi zen bi preso politikoen aurkako epaiketa, Jose Maria Lidon epailearen hilketaren harira. Gerora fiskaltzak atzera bota zituen Arzalluzen aurkako akusazioak, baina mantendu egin zuen Aspiazuren aurkako zigor eskaera. Orain, biak absolbitzea erabaki du auzitegiak, froga falta dela-eta. 2002. urtetik dute preso Arzalluz; eta Aspiazu, 2008. urtetik.
Espainiako Auzitegi Nazionalak badu ebazpena esku artean: absolbitu
egin du Garikoitz Aspiazu ere, Jose Maria Lidon epailea berak hil zuela
baieztatzeko froga nahikoa ez daudela argudiatuta. Auzitegiak ez ditu
fidagarritzat jo Lidonen senideek egindako identifikazioak. Hilketa
gertatu eta 10 urtera hiltzaile modura identifikatu zuten Aspiazu,
ustez, telebistan ikusitako irudi batzuetan.
Azaroaren 4an hasi zen Aspiazu eta Asier Arzalluz preso politikoen aurkako epaiketa, Espainiako Auzitegi Nazionalean. 2001. urtean Lidon erail izana leporatu zieten biei, eta fiskaltzak 30 urteko espetxe zigorra eskatu zuen hasieran bakoitzarentzat. Dena den, biek ukatu zituzten haien aurkako akusazioak. Getxon (Bizkaia) izan zen atentatua, baina haiek azaldu zuten ez zeudela Bizkaian hilketa jazo zenean.
Hala, epaiaren zain geratu aurretik, fiskaltzak baztertu egin zituen Arzalluzen aurkako akusazioak eta kartzela zigor eskaera, froga falta zela-eta. Besteak beste, azaldu zuten ezin zutela ziurtatu Olaia Komandoko kidea zela. Aspiazuren aurkako espetxe eskaera, baina, mantendu egin zuen: 30 urte. Epaileen ahaideei dagokienez, bi preso politikoentzako "zigor maximoak" galdegin zituzten orduko hartan ere.Arzalluz 2002. urtetik dute preso. Frantziako Estatuan atxilotu zuten, beraz, han kartzelaratu zuten lehenengo. Gero, 2005. urtean Espainiaratu zuten, Espainiako Estatuan epaitua izan zedin. Aspiazu 2008. urtetik dute atxilo, Lannemezanen (Okzitania). Dena den, irailean estraditatu zuten Mikel Karrerarekin batera, epaiketa zela-eta.
