Elkartasuna Patxi Ruizekin: hiru preso politikok janariari uko egingo diote, preso politiko batek "txapeoa" hasi du eta AAEAMeko lau kidek gose grebari ekin diote

Dani Pastor, Oskar Barreras eta Aitor Cotano preso politikoek uko egingo diote janariaren bandejari, gose eta egarri greban dagoen Patxi Ruizekin elkartasunean. Ibai Aginaga preso politikoak, aldiz, ezetz esango dio zeldatik irteteari. Bestalde, preso politiko txantrearrak abiatutako borrokaldiak dirauen bitartean, gose eta egarri greban egongo dira Amnistiaren Aldeko eta Errepresioaren Aurkako Mugimenduko kideetako lau. Etenik gabeko greba egingo dute horietako hiruk. Gaur, hirugarren eguna egingo du gose eta egarri greban Ruizek.
Argazki Nagusia
2020ko maiatzaren 13a

Gaur, maiatzak 13, hirugarren eguna egingo du gose eta egarri greban Patxi Ruiz preso politikoak. Duela bi egun ekin zion borrokaldiari, Murtzia II-ko zuzendaritzaren, modulu buruaren eta kartzelazainen mehatxuei erantzunez. Txantrearrarekin elkartasunean, borrokara batu dira lau preso politiko eta Amnistiaren Aldeko eta Errepresioaren Aurkako Mugimenduko lau kide.

Batetik, Dani Pastor, Oskar Barreras eta Aitor Cotano preso politiko bizkaitarrek uko egingo diote janariaren bandejari. Puerto III espetxean dituzte preso, Cadizen. Bestetik, Ibai Aginaga preso politikoak "txapeoari" ekin dio: ez da zeldatik irtengo Ruizek hasitako borrokaldia aurrera doan bitartean. Sevilla II kartzelan dute giltzapean, bakartze galeria batean.

AAEAMeko lau kide gose greban

Amnistiaren Aldeko eta Errepresioaren Aurkako Mugimenduak ohar bidez jakinarazi zuen atzo, hilak 12, gose greba hasi zutela lau kidek, 18:00etan. Horietatik hiruk etenik gabeko gose greba egingo dute, eta laugarren batek aldizkakoa; egun batean bai, bestean ez. "Bizkaiko lokal batean", "elkarrekin" ari dira baraualdia aurrera eramaten, eta Ruizen borrokak iraun artean "eusteko borondatea” agertu dute.