EHUk ezarriko ditu neurririk gogorrenak, zenbait hilabetez, berogailuak egunean bi ordu gutxiago pizteko plana jarriko baitu martxan. Larunbatetan liburutegiak ixtea eta berogailuetan 19 graduko gehienezko tenperatura ezartzea ere aurreikusten dute. Argindarraren faktura 5 milioi euro ingurukoa izan ohi da, baina 13 milioi eurokoa izango da aurten, kontsumoa %10 murriztu den arren.
ARGAZKIA / UPV/EHU
Elektrizitatearen fakturan aurrezteko hainbat neurri espero dira Euskal Herriko Unibertsitatean (UPV/EHU), Deustuko Unibertsitatean eta Mondragon Unibertsitatean (MU), baina unibertsitate publikoan izango dira murrizketarik gogorrenak. Berogailua 19 graduko tenperatura maximoarekin eta egunean bi ordu gutxiago piztuko dute hainbat hilabetez, eta larunbatetan ez da liburutegi zerbitzurik izango. Horretaz gain, leihoak eta ateak ixtea ere aztertzen ari dira, "bero-galerak saihesteko". Berehala igorriko dute agindua EHUren fakultate guztietara, 35.000 ikasleren, 5.500 ikerlari zein irakasleren eta bestelako 1.900 langileren kalterako.
Izan ere, EHUren argindar-fakturak ia hirukoiztu egingo dira urte amaierarako, aurreikusi dutenez. Ohiko gastua 5 milioi euro ingurukoa bazen, 2016an eta 2017an 5,3 milioikoa izatera igaro zen. Aurten, ordea, bikoitza baino gehiago izango da; 13 milioi ingurukoa. Dena den, murrizketekin ere "gastu handiak" espero dituzte; are gehiago, finantzazio-iturriak "murritzak" direla jakinik. "Garai oso zaila biziko dugu ", aitortu diote EHUko eledunek prentsari.
