AKTUALITATEA EDITORIALA IKUSPUNTUA LANGILE ZIENTZIA KOLABORAZIOAK AGENDA GEDAR TB ARTEKA
Argazki Nagusia
Argazkia: Aiztondoko Gazte Asanblada
2019/12/13 15:57

Gaur, abenduak 13, argitara atera da Zizurkilgo (Gipuzkoa) Kaxilda gaztetxearen aurkako auzibidearen ebazpena: eraikinaren berehalako hustea agindu du epaileak. Duela 10 egun izan zen gaztetxearen aurkako epaiketa Tolosan (Gipuzkoa), eta fiskaltzak eskaera gogorra egin zuen: espazioaren berehalako hustea zein Aiztondoko Gazte Asanbladako bi auzipetuen aurkako hiru hilabeteko kartzela zigorra galdegin zituen.

Epaileak bat egin du eskaera horrekin, eta dagoeneko eman du desalojo agindua. "Aiztondoko gazteok ilusioz eta sakrifizioz kolektibizatutako espazioa kenduko digute egun hauetako batean", adierazi dute asanbladako kideek. Hala, mobilizazioei adi egotera dei egin dute.

"Despolitizatuta eta mendeko nahi gaituzte, baina gu, antolatzera eta borrokatzera etorri gara; norgehiagokan baino, elkartasunean oinarritutako bizi eredu batean sinesten baitugu", diote. Bestalde, gogoan izan dituzte aste honetan bertan Gernikan (Bizkaia) hustu duten Bloke Naranja, eta desalojo arriskuan dagoen Hondarribiko Gaztetxea, Hondarribiko (Gipuzkoa) Egiluz jauregian kokatua dagoena. "Elkartasun eta babes osoa zuentzat".

EZ DAGO IRUZKINIK