Hainbat tanke ikusi dituzte azken orduetan errepideetan, Espainiako nahiz Frantziako polizia-indarrek babestuta.
FOTOGRAFÍA / @izar_gorria
Amerikako Estatu Batuak, Europako estatu nagusiak eta NATO bera gerra-testuingurua areagotzeko mugimenduak egiten ari diren bitartean, Euskal Herrian ere ikusten ari dira eskalada belikoari lotuta egon daitezkeen zenbait zantzu. Izan ere, azken orduetan, gerrarako ibilgailuak mugitzen ikusi dituzte bertako errepideetan.
X sare sozialean hainbat erabiltzailek jakinarazi dutenez, Gipuzkoatik Lapurdira eraman dituzte berriki hainbat tanke eta ibilgailu blindatu. Ez dute argitu zein den horien jatorria, baina Frantziako nahiz Espainiako estatuetako polizia-indarrek babestu dute ibilgailuen tokialdaketa. Zenbait erabiltzaileren arabera, hamabost tanke baino gehiago eraman dituzte Hego Euskal Herritik Iparraldera.
Aste honetan bertan, adierazpen bateratu bat argitaratu dute Europako hainbat Kanpo ministrok, tartean, Espainiako eta Frantziako estatuetakoek. Idatzi horretan, Errusiaren kontrako jarrera indartzeaz gain, "gastu militarra areagotzeko beharra" nabarmentzen dute agintariek.
