Madrilgo Puerta del Soleko kanpaldiak bosgarren gaua beteko du ostegun honetan, eta 1.200 kanpin-denda baino gehiago dira jada, elDiario.es-en kalkuluen arabera. Atzo egin zuten bigarren batzar jendetsu bat, eta etxebizitzari eta beste borroka batzuei buruz eztabaidatzeko balio izan zuen: Ceuta eta migrazioa, etxeko langileak, erroldatzea eta Mostoleseko La Casikaren desalojoa, urriaren 6rako aurreikusita dagoena. Handik, mugimenduaren "demokratizazioa" bultzatu zuten, 20 laguneko taldeekin eta bozeramaileekin, Antolatzea da irtenbide bakarra lelopean.
Milaka lagunek "ez goaz, geratu egingo gara" oihukatu zuten Soletik, greba orokorra aldarrikatuz eta "hau hasi besterik ez da egin" esanez. Valeria Racu, Madrilgo Maizterren Sindikatuko kidea, "paradigma aldaketa" batez mintzatu zen: "Jada ez dugu arduradunik bilatzen gugandik gertu... Badakigu erantzuleak inbertitzaileak direla... Estatu-krisi bat sortu dugu". Madrilgo Erkidegoak 48 orduan plaza husteko eskaera egin zuen, baina, Espainiako Gobernuaren Ordezkaritzaren arabera, "biltzeko eskubidea lehenesten du".
Kanpaldiak eta protestak Bartzelonara (ehun bat pertsona Plaça Catalunyan), Valentziara (non Danielen etxegabetzea hamar egunez atzeratzea lortu duten), Alacantera (500 pertsona inguru turistifikazioaren aurka), Santanderrera, Las Palmasera, Sevillara, Santiagora eta Galiziako eta Andaluziako beste hiri batzuetara hedatu dira.
Maizterren Sindikatuak datozen egunetarako ekimenak argitaratu ditu, Soletik harago: greba orokorrerantz lelopean. Ostegun honetan, 20:00etan, PPren aurkako elkarretaratze eta kazerolada batera deitu du Madrilgo udaletxearen aurrean, eta goiz osoan zehar maizterren piketeak izango dira manifestaziora eta grebara bidean. Bestalde, Maizterren Sindikatuen Konfederazioak kazeroladak deitu ditu gaurko Espainiako Estatuko udaletxe guztien aurrean, CCOOren babesarekin. UGTk bezala, zeharka begiratzen dio CCOOk greba orokorraren aukerari, Espainiako Kongresuko bozketen emaitzen zain.
Bihar, Kongresuaren ezohiko osoko bilkuran dekretuak bozkatzearekin batera, kontzentrazio bat antolatu dute bertan. Egun berean, 20:00etan, ekitaldi publiko bat izango da, Soleko txinparta eramango dugu Madrilgo txoko bakoitzera lelotzat hartuta, sindikatuaren karpan. Larunbatean, 12:00etan, estatu mailako manifestazio batera deitu dute, Etxebizitzaren aldeko greba orokorrerantz. Alokairuen %50eko jaitsiera eta putre-funtsen desjabetzea ORAIN aldarritzat hartuta. Asteburuan, Konfederazioak antolatutako manifestazioak espero dira, estatuko gutxienez 22 hiritan.
CJS gazte-koordinadokundeak gazte langileen blokeak egingo ditu mobilizazio horietako batzuetan. Kataluniako Sindicat d 'Habitatge Socialista de Catalunyak ere manifestazio masibo bat deitu du L' Hospitaleten larunbaterako, bi astean etxegabetzeengatiko bi suizidio izan diren hirian. Euskal Herriko Etxebizitza Sindikatu Sozialistak, bestalde, batzar herritarrak antolatu ditu bihar arratsalderako, eta manifestazio bateratuak egingo dituzte horren ondoren Euskal Herriko Etxebizitza Sindikatuek.
Hari-harian dauden bi dekretu
PSOEk eta Sumarrek adostutako bi errege-dekretu onartu ditu berriki Espainiako Gobernuak, eta bihar baliozkotu nahi ditu Diputatuen Kongresuan. Lehenengo dekretuak, onartzeko probabilitate handiagoarekin, etxegabetzeen aurkako babesa 2030eko abenduaren 31ra arte zabaltzen du, denboraldiko eta logeletako alokairuak arautzen ditu, putre-funtsen bidez etxebizitza erostea debekatzen du 2028ra arte, 2028ko abenduaren 31 baino lehen amaitzen diren kontratu jakin batzuk bi urtez luzatzen ditu eta %10eko BEZa ezartzen du, besteak beste.
Bigarrenak, zailena dena eta etxebizitza-mugimenduaren eskari nagusia jasotzen duena, kontratuen berrikuntza automatikoa eta alokairu mugagabeetara iristea ezartzen du, baita bost-zazpi urteko epea amaitzean iraupen bereko luzapen automatikoa egotea eta etxejabe batek maizterra arrazoi justifikaturik gabe botatzen badu urtebeteko errenta ordaindu behar izatea ere. Etxebizitza-mugimenduak BOEn argitaratutako testuari egiten dion kritika nagusia bi dekretuen artean ezarritako "zatitzea" da, seinalatu baitu horrek errazten duela alderdiek neurririk estrukturalena (berrikuntza automatikoa) soilik bertan behera utzi ahal izatea. Gainera, adierazi dute baliozkotzeko aukera gehien dituen dekretuak ez dituela berariaz debekatzen etxegabetzeak eta ez diela atea ixten etorkizunerako, eta ez dagoela muga argirik enpresen eta putre-funtsen espekulazio-dinamikak gelditzeko. Maizterren Sindikatuen Konfederazioak bi dekretuak baliozkotzea babestu du, baina azpimarratuz sei egunean herritarren presioak "Mari Carmen Dekretuaren" neurri ia guztiak abiaraztea lortu duela, eta premiazko arau batek ez dituela atzera botako hainbat hamarkadaz etxebizitza negozio bihurtu duten politikak.
Alderdien jarrera
Bitartean, posizio parlamentarioak zabalik daude. Sumarrek dio "zatitzearen ondoriozko ondoeza ulertzen" duela, baina ezkerrari eskatu dio "laguntza emateko" eta dekretuen "edukian zentratzeko". EH Bilduk eta BNGk berretsi dute baiezkoa emango dietela bi dekretuei, baina aurrerapauso ez nahikoa dela aitortuz. ERCk, Junquerasen bitartez, "baldintzarik gabeko" babesaz hitz egin du, baina Rufianek zuzendu du gero: "Azken komara arte berrikusiko dugu... PSOEren testuak argiaren kontra begiratu behar dira". Bigarren dekretua garrantzitsuena dela onartu du, gainera.
PPk kontrako botoa iragarri du, neurria "tranpa bat" dela esanez. Juntsek eta Podemosek, bestalde, oraindik ez dute baieztatu euren babesa, eta erabakigarria da hori dekretuak baliozkotzeko. Maizterren Sindikatuak mobilizazioek irekitako "abagune historikotzat" jo du momentua, baina uste du etxebizitzaren aldeko greba orokor batek bakarrik lor dezakeela egiturazko aldaketa bat. Soleko kanpaldia eta hamaika lekutan izango diren protestak, dena den, biharko bozketaz harago doaz: "Hau ez da amaiera, ezta gutxiago ere".
