Laudioko (Araba) Maderas de Llodion beharginak kaleratzeari ekin dio jada enpresako zuzendaritzak. Langile-batzordeak jakinarazi du aste honetan hasi direla enplegu-erregulazioak jasotzen duen kaleratze kolektiboa burutzen, plantilla osatzen duten 151 langileetatik 39 botatzeko.

Izatez, epe bat ireki zuen zuzendaritzak, espedientera euren "borondatez" aurkeztu nahi zuten langileentzat; baina, epe hori amaituta, kaleratze-gutunik edo bestelako jakinarazpen ofizialik helarazi gabe hasi da zuzenean kaleratzeengatiko kalte-ordainak ematen. Horrela jakin dute kanporatutako pertsonek errealitate bat dela dagoeneko euren kaleratzea. Urriaren 13an amaitu zen espedientearen inguruko kontsulta-aldia, enpresaren eta langileen arteko akordiorik gabe.

Enpresako zuzendaritzaren jarreraz gain, Eusko Jaurlaritzarena seinalatu du langile-batzordeak. Bi asteko itxaronaldiaren ostean, batzordeko kideak herenegun bildu ziren Jaurlaritzako ordezkariekin, baina Industria Sailak ez zion kaleratzeen aurka esku hartzeko aukerari heldu ere egin, langile-batzordearen esanetan.

Plantillak hilabete darama greba mugagabean, kaleratzeei aurre egiteko, irailaren 22an jo baitzuen lanuztera. Ostiral honetan, urriaren 24an, manifestazio bat egingo dute beharginek Laudion, 18:30ean Eroskiko biribilgunetik hasita.