Bilboko IMQ enpresaren Zorrotzaurre eta Ama Birjina Zuria zentroetako langileak azaroaren 23tik daude greba mugagabean, eta salatu dutenez, dagoeneko formakuntza jasotzen ari dira grebalariak ordezkatuko lituzketen langileak.
Greban dauden langileak, ostegunean egindako protestan. Argazkia: ELA
IMQ osasun-enpresa pribatuak Bilbon (Bizkaia) dituen Zorrotzaurre eta Ama Birjina Zuria zentroetako garbitzaileek salatu dute haien greba eskubidea urratua izan dela. Izan ere, langileak azaroaren 23tik daude greba mugagabean, soldata-arrakalarekin amaitzeko eta 90 langileren kaleratzeak ekiditeko.
Egoera horretan, langileek salatu dute enpresak ukatu egin diela haien greba eskubidea, greban dauden eta abendu honetan kaleratu nahi dituzten 90 langileen ordezkoak formatzen hasi delako jada enpresa. Hori dela-eta, greban dauden langileek elkarretaratzea egin zuten aurreko ostegunean, Zorrotzaurreko zentroko atarian.
Azaroaren 23tik greban
Langileek joan den azaroaren 23an hasi zuten greba mugagabea; enpresak garbiketa zerbitzua internalizatzea onartu zuen, baina uko egin zion 90 langilek osatutako plantilla subrogatzeari. Langile horietako batzuek 15, 20 edota 30 urte daramatzate lanpostu horretan.
