Martxoaren 3a da bihar, eta Gasteizko sei ikastetxetan eta campusean ekitaldiak egingo ditu IAk. Gasteizko Kontseilu Sozialistak eta GKSk deituta, Bloke Sozialista ere izango da arratsaldean, eta deialdi horrekin bat egin dute IAko kideek.
Polizia-indarrek bost langile erail zituzten Gasteizko (Araba) Zaramaga auzoan 1976an, milaka beharginek hasitako mobilizazio eta greba zikloaren aurkako erantzun modura. Bihar izango da sarraskiaren 46. urteurrena, eta aurten ere zenbait ekitaldi prestatu ditu Ikasle Abertzaleakek.
Gasteizko sei ikastetxetan omenduko dituzte 1976an hildako langileak bihar goizean; hain justu, Ekialden (lehenengo atsedenaldian, barruko patioan), Los Herranen (11:00etan, patioan), Unamunon (11:00etan, ate urdinaren aurrean), Koldo Mitxelenan (10:45ean, sarreran), Zabalganan (lehenengo atsedenaldian, patioan) eta Ikasbidean (bigarren atsedenaldian, patio zabaleko karpan).
Arabako hiriburuko campusean, aldiz, eguerdirako egin dute deialdi bat. 12:00etan izango da ekitaldi politikoa, Letren fakultateko patioan.
Bloke Sozialista arratsaldean
Gasteizko Kontseilu Sozialistak eta Gazte Koordinadora Sozialistak, bestalde, Bloke Sozialista batera deitu dute arratsalderako, sarraskiaren urteurrenaren harira egiten diren mobilizazioen barruan. 17:45ean aterako da Bloke Sozialista, Rafa plazatik, Lekukoa hartu, sozialismoa eraiki! aldarripean. Zutabe horretara batzeko deia egin dute IAko kideek ere.
