Parisek errekrutatze-kanpaina bati ekingo dio aste honetan, hamar hilabeteko soldaduska "boluntario" polemikoari lotuta. Emmanuel Macronek bultzatu du neurria, Europako tentsio geopolitikoei erantzunez. Azaroan iragarri zuten programa, eta, hasiera batean, 2026an 3.000 gazte erakartzea du helburu. 2030ean, ordea, 10.000 gazte errekrutatu nahi ditu, eta 2035ean, 42.500 soldadu errekrutatzera iritsi nahi du. Soldadu berrien %80 18-19 urtekoak izatea omen da asmoa, eta 20-25 urtekoak, berriz, %20.

"Mobilizazio Eguna" deiturikoan (lehen Defentsa eta Herritartasun Eguna) ekin diote prozesuari. Galdetegi baten bidez atzemango dituzte gazteak, hurrengo elkarrizketetara eta proba fisikoetara bideratzeko. Armadaren, Itsas Armadaren eta Aire-Indarraren online plataformek osatuko dute soldadu kopurua areagotzeko dinamika, baita CIRFA zentroek edo telefono espezifiko batek ere.

Behin hautatzen dituztenean, hilabeteko oinarrizko prestakuntzari ekingo diote gazteek (tiroa, martxa, topografia), eta, ondoren, bederatzi hilabeteko barne-zerbitzua izango dute. Eliseoaren arabera, ez dute "kanpo-gatazketan" esku hartuko. Gobernuak "urte sabatiko patriotiko" gisa saltzen du "borondatezko" soldadutza hori, baina ahots kritikoek derrigorrezko soldadutzaren berrezarpena eta gazteen prekaritatearen esplotazioa normalizatzeko neurri gisa salatu dute. Izan ere, gazte bakoitzak 800 euro kobratuko ditu hilean, gutxieneko soldata baino askoz ere gutxiago.

Ikasleen sindikatuek protesta egin dute. "Soldadu merkeen fabrika bat da, Afrikan frantziar inperialismoari eusteko", diote, Malin edo Erdialdeko Afrikan hedatutako 6.000 legionarioak gogora ekarriz. Macronek, bere onarpena maila oso baxuan dagoela-eta, barne-krisitik nazionalismo militarista baterantz desbideratu nahi du arreta ekimen horrekin.