Espainiako Estatuan lapurreta txikiak behin baino gehiagotan egiteagatik espetxe-zigorra ezarriko da aurrerantzean

Actualidad / REFORMAS

Hemezortzi hilabetera arteko espetxealdiak ezarri ahal izango dituzte 400 eurotik beherako lapurreta txikiak berriz ere egiteagatik. Erreforma penala Kongresutik Senatura igorri dute tramitazioa osatzeko, eta uda osterako egon daiteke indarrean. PSOE, Unidas Podemos, Esquerra, EAJ, PDeCAT, Ciudadanos, Más País-Equo eta Compromis alderdien babesa jaso du legeak. EH Bildu eta CUP abstenitu egin dira.

2022/06/24 13:13

Zigor Kodea errenta baxuenen kalterako gogortu berri dute Espainiako Kongresuaren osoko bilkuran. Joan den ostegunean onartutako erreforma penal berriak, proletarioen aurkakoa dena erabat, hemezortzi hilabetera arteko espetxe-zigorrak zehazten ditu 400 eurotik beherako lapurretak egiten dituzten pertsonentzat, "delitugile berrerorleak" baldin badira. Hau da, janaria edo bestelako oinarrizko produktuak osten behin baino gehiagotan harrapatzen dituzten pertsonak, adibidez, zuzenean kartzelaratu ahal izango dituzte hemendik aurrera, zigor administratiboa ordaintzera behartu beharrean.

PSOEren eta PDeCATen artean adostutako zuzenketa baten bidez, honela berridatzi dute Zigor Kodearen 234. artikulua: "400 eurotik beherakoak diren lapurretak, orain arte isunekin bakarrik zigortzen zirenak, sei hilabetetik hemezortzi hilabetera arteko espetxealdi-zigorrekin epaitu ahal izango dira, betiere, erruduna lehenago kondenatua izan bada izaera horretako gutxienez hiru deliturengatik, delitu horiek arinak izan arren".

Ebazpenaren erantzule zuzenak PSOE, Unidas Podemos, Esquerra, EAJ, PDeCAT, Ciudadanos, Más País-Equo eta Compromis alderdiak dira, haien 190 diputaturen babesa izan baitu legeak. EH Bildu eta CUP ez dira ezezkorik ematera ausartu, eta abstenitu egin dira. PDeCATek gogorarazi duenez, hainbat Justizia zein Barne ministrok aurrez agindu izan duten neurria da, "merkataritzan, sukaldaritzan eta turismoan eragin handia zuelako".

Espetxearen eta miseriaren artean

Legearen bultzatzaileen ustez, "Zigor Kodearen mehatxu- zein disuasio-gaitasuna handituko da", non eta, inflazio gorakorreko testuinguruan, bizibideen kostuak etengabe igotzen ari diren. Litekeena da aipatutako legeak milaka lagun are ataka larriagoan jartzea, espetxearen eta muturreko pobreziaren artean aukeratu behar izateraino.

"Inork pentsa dezake lapurreta horiek egiten dituzten pertsonak gaur atxilotu eta bihar kalera ateratzen dituztela, eta jarduera horrekin jarraitzen dutela ia modus vivendi gisa", esan du PDECATeko Justizia gaietako arduradun Genis Boadella diputatuak. Argi utzi du horrekin amaitzera doazela, lehen hala ez baldin bazen ere.