Jaurlaritzak %10 igo ditu ertzainen soldatak, eta milioika euro gastatuko ditu Ertzaintzako komunikazioak nahiz ibilgailuak hobetzeko.
Eusko Jaurlaritzako Gobernu Kontseiluak urriaren amaieran onartu zuen 2026rako aurrekontu orokorren proiektua. 16.378 milioi eurokoa da, 2025ekoa baino %4,1 handiagoa. Segurtasun Sailak, zehazki, 850 milioi euroko aurrekontua izango du hurrengo urtean, aurten baino %6,4 gehiago. Igoera hori ia osorik bideratuko du Ertzaintzako soldatak handitzera: igoeraren %94, hain zuzen ere, ertzainen soldatak puzten gastatuko du.
Gobernu Kontseiluak udan onartu zuen Ertzaintzako baldintzak hobetzeko dekretua, ertzainen gehiengo sindikalak eta Jaurlaritzak 2024ko martxoan akordioa lortu ostean. 2025-2028 aldirako, agenteen soldatak %10 igotzea hitzartu zuten (gutxienez 4.200 euro gordin gehiago irabaziko ditu bakoitzak), bestelako plus batzuk ezartzeaz gain. Udan eman zuten aditzera urrian sartuko zela indarrean soldata-igoera, eta milioika euro bideratuko dituzte horretara hurrengo urtean zehar.
Bingen Zupiriaren azken hitzak jaso ditu Berria-k. Segurtasun sailburuaren esanetan, aurrekontuetan erakusten dute ahaleginduko direla 2030erako 8.000 ertzain izaten, eta horretarako beharrezko aldaketak egingo dituzte Arkauten. Azken deialdian izandako suspentso masiboaren ondoren, laster izango da beste oposizio-deialdi bat.
Ertzaintza "modernizatzeko" inbertsioa egingo dutela ere nabarmendu du Zupiriak: esaterako, Enbor komunikazio-sistema garatzeko gastatuko dituzte 17 milioi euro hurrengo urteetan, Ertzaintzaren komunikazioak "azkarragoak eta seguruagoak" izan daitezen; eta 13 milioi euro erabiliko dituzte ibilgailuak berritzeko.
