Bilboko (Bizkaia) Kontseilu Sozialistak joan den otsailean eman zuen Langile Autodefentsa Sarea Bilboren sorreraren berri. Hasieratik azaldu zuenez, sareak helburutzat du "soldatapeko lanaren esparruan defentsa-mekanismoak garatzea", eta lan-gatazketan esku hartzeari ekin dio jada. Borroka bati ekin zion udaberrian, eta jakinarazi berri du kasua irabazi duela.
Autodefentsa Sareko kideek azaldu dutenez, apiril erdialdean lan-istripua izan zuen behargin batek Bilboko Alde Zaharreko harnburgeseria batean. Babes Ekipamendu Indibidualik ez zeraman une horretan, eta ez zuen aurretiko prestakuntzarik jaso egiten ari zen lanetarako. Horretaz gain, lan-kontraturik gabe ari zen lanean.
Larrialdietara joan zen langilea, baina horren ostean, nagusiak ez zuen lan-istripuaren erantzukizunik hartu bere gain. Orduan jarri zen behargina Langile Autodefentsa Sarea Bilborekin harremanetan, eta borroka-prozesu bat hasi zuten. Nagusiak lan-istripua izan zela onartzea eta langileari kalte-ordainak ordaintzea zen helburu nagusia, eta lortu dute: baldintza horiek onartu ditu azkenean nagusiak.
"Nagusien inpunitateari eta langileon zaurgarritasun egoerari aurre egiteko ezinbestekoa da defentsa bitartekoak garatzea", nabarmendu du Bilboko Kontseilu Sozialistak.
🔵🔴LANGILE AUTODEFENTSA SAREA
— Kontseilu Sozialista Bilbo (@Kontseilua_Bilb) July 4, 2022
𝗟𝗔𝗡-𝗚𝗔𝗧𝗔𝗭𝗞𝗔 𝗕𝗔𝗧 𝗜𝗥𝗔𝗕𝗔𝗭𝗜 𝗗𝗨𝗚𝗨
Langileon antolakuntza independentearen bidez, Alde Zaharreko hanburgeseria bateko nagusiak langile batek izandako lan-istripu egoera onartzea eta kalte-ordaina bere gain hartzea lortu dugu. pic.twitter.com/5tgvkJJ5gn
