Zubietako erraustegiko langileen greba eskubidea, urratuta

Gaur da langileen aurreneko greba eguna, eta salatu dute gehiegizko zerbitzu minimoak ezarri dizkietela eta grebalariak ordezkatu dituztela.
Argazki Nagusia
Argazkia: ELA
2021eko azaroaren 23a

Greba mugagabeari ekin diote gaur, azaroaren 23an, Zubietako (Gipuzkoa) erraustegiko langileek. Zuzendaritzarekin hitzarmen bat negoziatzea da haien asmoa, lantokiko "prekaritateari" aurre egiteko; izan ere, jakinarazi dute "argudiorik gabe" kaleratzen dituztela langileak eta osasun- nahiz lan-baldintzak okerragotzen ari direla etengabe. Ekobal da erraustegia kudeatzeko azpikontratatutako enpresa.

Aurreneko greba egunean salatu dute beharginek Eusko Jaurlaritzak "abusuzko" zerbitzu minimoak ezarri dizkiela. Ekoizpen-eremuan %70eko gutxieneko zerbitzuak inposatu dizkie, eta balorizazio-plantan, berriz, %90ekoak. Gainera, grebalariak ordezkatu dituzte haien lanpostuetan, azpikontratatutako beste enpresa batzuetako langileen bidez.


Iruzkinak

Ez dago iruzkinik