Donald Trump AEBetako presidenteak astearte honetan iragarri duenez, Venezuelan sartzen edo bertatik irteten diren petrolio-ontzi guztiak "erabat blokeatuta" daude, Nicolas Maduroren gobernuaren aurkako presio-kanpainak nabarmen gora egin baitu. Truth Socialen argitaratutako mezu batean, Trumpek formalki deitu zion "atzerriko erakunde terrorista" Venezuelari, "aktibo estatubatuarren lapurreta, terrorismoa, narkotrafikoa eta pertsonen salerosketa" leporatuta.

"Gure aktiboen lapurretagatik eta beste arrazoi askorengatik, hala nola terrorismoa, narkotrafikoa eta pertsonen salerosketa, Venezuelako erregimena ATZERRIKO ERAKUNDE TERRORISTA izendatua izan da", idatzi zuen Trumpek. "Beraz, gaur Venezuelan sartzen eta irteten diren PETROLIO-ONTZI ZIGORTU GUZTIAK ERABAT ETA OSORIK BLOKEATZEKO agintzen dut". Agintari faxistak gaineratu zuen Venezuela "erabat inguratuta" daukala Hego Amerikan sekula bildu den armadarik handienak, eskualdean hedatu baitira milaka tropa, dozena bat gerra-ontzi eta hegazkin-ontzi bat.

AEBetako indarrek Venezuelako kostaldean petrolio-ontzi zigortu bat lapurtu ostean etorri da neurri hori. Operazio hori "pirateria" gisa salatu zuen Caracasek. Harrezkero, Venezuelako petrolio gordinaren esportazioak izugarri jaitsi dira, estatuaren PDVSA petrolio-enpresaren sistemei eragin zien zibereraso bat tartean. Milioika upelez betetako ontzi ugari daude Venezuelako uretan ainguratuta, harrapa ditzatela saihesteko.

Iragarpenak berehala kolpatu zituen petrolio-merkatuak. AEBetako petrolio gordinaren gerokoek %1 baino gehiago egin zuten gora, eragiketa asiarretan 55,96 dolarrera heldu baitziren upel bakoitzeko, asteartean 55,27 dolarretan itxi ondoren, 2021eko otsailetik izandako mailarik baxuena. Analista batzuek adierazi dutenez, gorakada horrek Venezuelako esportazioen murrizketari aurre hartzeari erantzuten dio, egunean 900.000 upel ingurukoa izaten dena. Hala ere, eragina mugatua izan daiteke; blokeoa, hasiera batean, zigortutako ontzien aurkakoa baita, egunean 300.000 upel inguru barne hartuz.

Venezuelako Gobernuak gogor errefusatu du interbentzioa, "nazioarteko zuzenbidea, merkataritza librea eta nabigazioa urratzen dituen mehatxu barregarritzat" joz. Nicolas Madurok, ekitaldi publiko batean, "AEBetako inperialismoari" leporatu zion "Venezuela kolonizatzea, petrolio, gas, urre eta beste mineral erreserba handienez jabetzeko". "Gure aberria baldintzarik gabe defendatuko dugula zin egin dugu, eta Venezuelan bakea izango da garaile", zioen Madurok. Kritikak AEBetatik ere sortu dira, dena den. Joaquin Castro kongresukide demokratak, Texasen, "Kongresuak baimendu ez duen eta AEBetako herriak nahi ez duen gerra-ekintza" gisa deskribatu zuen blokeoa.

Maduroren aurkako Trumpen kanpainak Karibeko presentzia militarra handitzea ekarri du, baita Ozeano Barean eta Kariben 24 eraso baino gehiago egitea ere, "narkotrafikoagatik susmagarriak" omen ziren ontzien aurka. Asteartean Vanity Fair-en argitaratutako elkarrizketa batean, Trumpen kabineteko buru Susie Wilesek esan zuen itsasontzien aurkako erasoen bidez presioa egin nahi dutela, Madurok "amore eman arte".