HEFA fakultateko dekanotza berriak aho batez onartu du biltzeko askatasuna bortxatzeari uztea eta ikasleei jardun politikorako gela bat emateko beharra. Baldintzak nahiz gela bera zehazteko bilerak deitu dituzte datorren asterako. Lorpena "egunez egun egindako lan eta borroka nekaezinei esker" izan dela azaldu du UIBk.
Argazkia: UIB
Unibertsitateko Indar Batasunak (UIB) asteartean aditzera eman duenez, Ibaetako campuseko (Donostia, Gipuzkoa) HEFA fakultateko dekanotzak "borondate irmoa" azaldu du ikasleen aldarrikapenak asebetetzeko. Dekanotza talde berriak ohar bat helarazi die, negoziazio-mahai bat sortzeko eta prozesua amaierara arte eramateko "konpromiso atzeraezinarekin". Maiatzaren 3rako deitu dute bilera bat, Ikasle Kontseiluarekin eta dekanotzako ordezkaritzekin batera.
Negoziazioari hitzordua jarri eta gela bat ikasleria antolatuaren esku uzteko konpromisoaz gain, UIBk askatasun politikoen faltaren inguruan egindako salaketari arrazoia eman dio dekanotzak. Ikasleek, trukean, aste honetan hartutako 0.1 eta 2.1 gelak utzi dituzte. "Lorpen hau ez zen posible izango egunez egun egindako lan eta borroka nekaezina gabe", azpimarratu du UIBk. Hala, borroka prozesuan zehar zabaldutako aldarrikapena ekarri dute gogora: "Garaipenaren funtsa, antolakuntza".
