Egoitza nagusia Basaurin (Bizkaia) duen Sidenor altzairutegiak atzo esan zuen eten egin dituela Israelgo Estatuari egindako altzairu salmentak, Espainiako Gobernuak estatu sionistarekin "esportazio-kontratuak eteteko" hartutako ustezko erabakiarekin bat eginez. Enpresak salmenten %0,5 inguru bideratu zituen Israelgo Estatura 2024an, eta komunikatu baten bidez justifikatu du azken erabakia, "joan den apirilean Espainiako Gobernuak Israeli salmenten kontratua eteteko hartutako erabakiagatik".

Hainbat erakundek, dena den, zalantzan jarri dute gobernuaren hautu hori. Izan ere, salatu dute enbargoa ez dela integrala, eta, oraindik ere, "erabilera bikoitzeko" materiala eta industria-osagaiak armamentu bihurtzen dituztela, guztiak ere Palestina okupatura doazenak.

ELA, LAB eta ESK sindikatuek, BDZ plataformarekin batera, publikoki salatu zuten Sidenorrek Israelgo Estatuko armamentu-industriarekin duen konplizitatea. Hala, jakinarazi zuten euskal enpresak gutxienez 1.200 tona altzairu bidali dituela IMI Systemsera iazko udatik hona. Israelgo Estatuko arma-fabrikatzaile nagusietako bat da hura.

Sidenorren erabakia mobilizazio eta ekintza legal batzuen testuinguruan iritsi da. Comunitat Palestina de Catalunyak eta Coalició Prou Complicitat amb Israelek enpresaren aurkako kereila bat aurkeztu zuten, kontrabandoa eta Palestinako genozidioarekiko konplizitatea egotzita. Bien bitartean, erakunde sozialek eta sindikalek gardentasuna eskatu dute estatu sionistara bidaltzekoak ziren altzairuzko 40 sorten helmugari buruz, oraindik ez baitute argitu Bartzelonako portuan dagoen ZIM Luanda itsasontziko karga, eta ohartarazi dute uztailaren 15ean izan daitekeela ontziratua ZIM Iberian. Espainiako Gobernuak ez du ukatu ontzien amarratzea, nahiz eta alderdiek eta kolektiboek hala eskatu, eta Bartzelonako Udalak gogora ekarri du armen joan-etorriaren aurkako udal-mozioa.

Azken deialdia egin duten erakundeek portuko langileei eskatu diete uko egin diezaiotela Israelgo Estatura armak bidaltzen ari diren ontzi-enpresei beren zerbitzuak emateari, eta Moncloari "gardentasuna" eskatu diote "40 altzairu sorten zamaren egoerari eta kokapenari buruz", baita ZIM Iberiaren amarratzea ikuskatzea eta ukatzea ere. Gainera, Sidenorren hornidura IMI Systemsera ez iristea eta gobernuak estatu sionistari armak osorik enbargatzea berma dadila ere eskatu dute. Neurri hori Europa mailan har dadila eskatzen du Espainiako Gobernuak, baina, gero, ez du bere etxean betetzen, nahiz eta Ministroen Kontseiluak hori egiteko ahalmena izan.