Urriaren amaieran Israelen egitekoak diren hauteskunde legegileen testuinguruan, Itamar Ben Gvir Segurtasun Nazionaleko ministro eta Botere Judua alderdi faxistako buruak Deskonexioa 710 izeneko proiektu politikoa argitaratu zuen aurreko ostegunean. Gazako Zerrendatik, zazpi urteko epean, 1,86 milioi pertsona euren "borondatez" ateratzea bilatzen du ekimenak. Era berean, urriaren 27ko hauteskundeen ondoren bere alderdiak gobernuan jarraitzen badu, "Migrazio Ministerio" berri bat sortzea eta hura gidatzea eskatuko duela esan du buruzagi faxistak. Aurrekontua, eskumen propioak eta neurriak ezartzeko gaitasun betearazlea izango lituzke ministerio horrek. Duela gutxi egindako adierazpen batzuetan, "gauero 30 edo 40 palestinar hiltzearen" alde egin du Ben Gvirrek berak.
Aipatutako dokumentuak, Segurtasun Nazionaleko sailak esleitutako talde berezi batek landu duenak, kronograma mailakatu bat artikulatzen du, ghettotik biztanleria masiboki kanporatzea kalkulatzen duena. 2023a baino lehen, 2,3 milioi biztanle ingurukoa zen bertako errolda. Ministroaren bulegoak elkarbanatutako zifren arabera, sistema aplikatzen den lehen urtean, 250.000 pertsona inguruk utzi beharko lukete Zerrenda; horixe da proiektatutako jomuga. Maila hori handitu egingo litzateke, hirugarren urtearen amaieran 1,11 milioi desplazatu izatera iritsi arte. Azkenean, aurreikusitako zazpi urteen buruan 1,86 milioi kanporatu izango lirateke.
Deskonexioa 710 planak garbiketa etnikoa instituzionalki kokatzeko hamabi printzipio finkatzen ditu. "Ezinbesteko" eskakizunen artean, honako hau nabarmentzen du: "Irteera bakar bat ere ez da egingo migratzaileei estatus legal formalizatua emateko prest dagoen herrialde hartzaile baten aldez aurreko onespenik eta bitartekaritzarik gabe". Barne-araudiak lehentasuna ematen dio familia-unitate osoak kanporatzeari.
Hauteskundeak laster izango direnez, Botere Juduko buruzagiak 100 eguneko ibilbide-orri bat egin du legegintzaldi berriaren balizko hasierarako. Epe horretan, sistemaren oinarri legala aldarrikatzea, izena emateko plataforma martxan jartzea eta herrialde hartzaileekin lehen aliantzak ixtea aurreikusten du. Alderdi ultraeskuindarrak egindako aurretiazko analisietan, Turkia, Etiopia, Kongoko Errepublika Demokratikoa eta eremu arabiarreko hainbat estatu aipatzen dira balizko helmuga gisa, baina, oraingoz, administrazio horietako batek ere ez du adierazi plana sinatzeko prest dagoenik.
Ben Gvirrek iritzi publikoaren inguruko ikerketa batzuk aipatu zituen, eta horien arabera, Israelgo gizartearen gehiengoak bat egiten du palestinar guztiak Zerrendatik kanporatzeko ekimenekin. Era berean, adierazi zuen biztanle gazatarren zati handi batek "irtenbide iraunkor bat ebaluatzeko joera" izango lukeela, bere gobernuak berak eragindako bizi-baldintzen narriadura larriaren eta azpiegitura zibilen erabateko suntsipenaren ondorioz.
