Nafarroan neurri murriztaile zorrotzagoak jarriko dituzte martxan ostegunean, eta gutxienez bi astez egongo dira indarrean. Besteak beste, konfinamendu perimetrala delakoa ezarriko dute lurraldean, "lanarekin edota osasunarekin lotutako arrazoiengatik" ez badira, sarrera eta irteera guztiak debekatuz. Bestalde, EAEn ere neurri berriak iragarri ditu Eusko Jaurlaritzak: gehienez sei pertsona elkartu ahal izango dira, Nafarroan bezala.
Maria Chivite. Argazkia: vozpopuli.com
Kasu positiboen gorakada argudio hartuta, badirudi Hego Euskal Herri osoan ezarriko dituztela neurri murriztaile gogorragoak datozen egunetan. Nafarroako Gobernuak gaur iragarri ditu neurri berriak: mugimenduak mugatu eta konfinamendu perimetrala delakoa ezarriko dute lurraldean. Hala, debekatuta egongo dira sarrera eta irteera guztiak, "lanarekin edo osasunarekin lotutako arrazoiak" tartean ez badira.
Bestalde, itxita egongo dira taberna, jatetxe eta ostatu guztiak, eta etxera eramateko janariak eta edariak soilik eman ahalko dira. Gainera, 21:00etan itxi beharko dira saltoki, komertzio eta abarrak, eta ordu berdinean amaitu beharko dira kultura eta kirol ekitaldiak.
"Eremu pribatuko bilkurei" dagokienez, momentuz, familiako kideak edo elkarrekin bizi direnak soilik elkartzera dei egin du Nafarroako Gobernuak.
Ostegunean, hilak 22, 00:00etan sartuko dira indarrean neurri murriztaile berriak. Gutxienez 14 egunez egongo dira indarrean Maria Chivite presidentearen esanetan estatuan "hartu diren neurri gogorrenak" direnak.
Neurri berriak EAEn ere
Araban, Bizkaian eta Gipuzkoan ere neurri zorrotzagoak iragarri ditu Eusko Jaurlaritzak. Besteak beste, elkartu daitekeen pertsona kopurua jaisteko neurria ezarriko du, antza: gehienez hamar lagun beharrean, sei baino ezingo dira bildu.
