Ekoizpena langileen ekimenez geldiarazi eta gero, 5.000 beharginei eragingo dieten lan-erregulazio txostenak osatu ditu enpresak. Patronala ez dago dosierren nondik norakoak negoziatzera behartuta, eta ez du langilegoari kalteordainak eskaintzeko borondaterik. 300 baino gehiago dira sintomak aurkeztu ostean etxean berrogeialdia igarotzen ari diren enplegatuak.
Gasteizko (Araba) Mercedes Benz automozio lantegian 14 langilek eman dute positibo Covid-19 birusa atzemateko frogetan. Bestalde, enpresako 5.000 beharginen lanpostuak kolokan daude egun, lan-erregulaziorako txostenak aurkeztu baititu zuzendaritzak.
Legediak ez du enpresa langileekin negoziatzera derrigortzen. Hortaz, momentuz, ez die inolako konpentsaziorik ordainduko, beharginek ekoizpenaren geldialdia beste lanegun batzuen bidez ordezkatzeko prestutasuna adierazi duten arren. ELA sindikatuak jakinarazi duenez, Daimler taldeko beste lantoki batzuetan halako neurriak lortu dituzte kalteordainei dagokienez.
Lantegi horretan soldatapean jarduten dutenen artean 300 kasu sintomatikotik gora zenbatu dituzte dagoeneko. Kutsatze arriskuan dauden langile horiek isolamendu baldintzetan daude euren etxeetan.
Zifra orokorrak
Azken datuen arabera, Hego Euskal Herriko enpresek osatutako lan-erregulazio txostenen zenbatekoa goruntz doa, eta 70.462 langileri eragiten dieten 11.637 dosier daude dagoeneko mahai gainean. Atzo 8.250 ziren erregulazio txostenak, eta 52.213 horien eraginpean zeuden beharginak.
