Elikagaien eta lehengaien prezioek maximo historikoak gainditu dituzten honetan, merkeagoak izan daitezkeen hainbat gai giza kontsumorako erabiltzeko araudia zabaltzen ari dira, zenbait enpresaren eskaerak tarteko.
Kilkerrekin eta onddoekin egindako giza kontsumorako elikagai berriak merkaturatzeko baimena eman du Elikagaien Segurtasunerako Europako Agintaritzak (EFSA), Europar Batasunaren Egunkari Ofizialean ageri denez. Urtarrilaren hasieran argitaratutako araudi berriaren bidez, etxe-kilkerraren (Acheta domesticus intsektua) hautsa onartu zuten elikagai modura Europar Batasunean; besteak beste, ogia, galletak, saltsak, zopak, garagardoaren antzeko edariak, txokolateak, patata frijituak eta abar egiteko. Cricket One Co. Ltd enpresak 2019an eskatu zuen kilkerren hauts partzialki koipegabetua erabili ahal izatea, eta oraintsu onartu du neurria EFSAk. Horretaz gain, zenbait perretxikorekin egindako gaiak baimendu ditu oraintsu; adibidez, D2 bitamina daukan perretxiko-irina.
Iaz, EFSAk simaurreko kakalardoaren (Alphitobius diaperinus) larbak onetsi zituen elikagai modura. Horretarako eskaria ere enpresa baten eskutik heldu zen. 2018an, intsektu horren larbak erabili ahal izatea eskatu zuen Ynsect NL B.V enpresak: osagai modura baliatu nahi zituen; izoztuta, pasta bihurtuta, lehortuta nahiz hauts bilakatuta.
2021eko uztailean, bestalde, irin-harrak baimendu zituzten elikagai gisa Europar Batasunean. Urte horretako azaroan, otarrain migratzailea (Locusta migratzailea) merkaturatzeko baimena ere eman zuten.
Oinarrizko elikagaiak, maximo historikoetan
Giza kontsumorako baimenduta dauden elikagaien zerrenda handitzeko neurriak, hain justu, oinarrizko elikagaien prezioak maximo historikoak hausten ari diren unean ari dira heltzen. Espainiako Estatistika Institutuak (INE), esaterako, iazko azaroan jakinarazi zuen inoizko igoerarik handiena izan zela urtebetean elikagaien prezioetan; %15,4koa.
