Sidenor enpresaren fabrikekin egin modura, Eusko Jaurlaritzak behartu egin ditu Tubacexeko beharginak ekoizpenarekin segitzera. Lan ikuskaritzak ez du lantokia aztertu eta ez du txostenik osatu, eta langileek salatu dute enpresak ez dituela ezarritako gutxieneko prebentzio eta segurtasun neurriak hartu.
Tubacexeko langileen mobilizazioa uztailean, lankide baten erailketa salatzeko. Argazkia: aiaraldea.eus
Covid-19 birusaren kutsatzea ekiditeko prebentzio eta segurtasun neurriak ez bete arren, hainbat lantoki irekitzera derrigortzen ari da Eusko Jaurlaritza. Horixe da Sidenor edota Laudioko (Araba) Tubacex enpresen kasua: zuzendaritzak beharginak babesteko gutxieneko neurriak hartu ez zituenez planto egin zuten haiek, ekoizpena geratuz, baina orain, lanera itzultzera behartu ditu Eusko Jaurlaritzak.
Sidenorrekin gertatu modura, ELAk salatu du Lan Sailak ez diola lan Tubacexeko egoerari buruzko txostenik eskatu lan ikuskaritzari, eta bisitarik ere ez dela izan.
Beharginek aste honetan bertan salatu dute maskararik ez dagoela beharrezkoak diren lanpostu guztietan eta ez dagoela bermatuta lanerako tresna guztien garbiketa eta desinfektazioa. Bestalde, haien artean gutxieneko prebentzio distantzia mantentzeko zailtasunak ere aipatu dituzte.
