Joan den asteburuan izan da Euzko Alderdi Jeltzalearen (EAJ) bederatzigarren Asanblada Orokorra, Donostiako (Gipuzkoa) Atano III.a pilotalekuan, alderdiaren botere-egitura berritzeko barne-hauteskundeei amaiera emanez. Jakina zen modura, orain arte Espainiako Diputatuen Kongresuan bozeramaile-lanak egin dituen Aitor Esteban izango da Andoni Ortuzarren ondorengoa, hark eskuratu baitu buruzagitza Euzkadi Buru Batzarrean (EBB). Horrekin bukatu da Ortuzarren hamabi urteko lidergoa.

Kargu berria eta hitza hartzean, batasunerako dei argia egin du Estebanek. Hauteskunde-prozesuan izandako lehiak eta aurkeztutako hautagaitza desberdinek agerian utzi zuten kohesio eta lidergo garbi baten falta EAJ barruan, eta azkenaldian Abiadura Handiko Trenaren (AHT) harira Donostiako alkate Eneko Goiaren eta Arabako ahaldun nagusi Ramiro Gonzalezen artean izandako liskarrek ikuspegi hori indartu dute. Estebanek, ordea, Donostiako ekitaldian ukatu egin zuen alderdiak "bi arima" dituenik: "22.000 arima gara, alderdikideak bezainbeste, eta gu guztion taupadak batera doaz, herri bat askatzeko helburu berbera oinarri dugula".

Goiak eta Gonzalezek asteburuan jendaurrean eta komunikabideen aurrean elkarri eskua eman izanak bat egiten du, hain zuzen ere, Esteban EAJren batasuna erakusteko tematu izanarekin. Buruzagi berriak azaldu zuen, "izenen gainetik", garrantzitsuena dela "alderdia zaintzea", eta hauteskunde-prozesua goraipatu zuen, "errespetuan oinarritutako prozesu demokratiko bat" izan dela nabarmenduz. Otsailean, Ortuzarrek Estebanen hautagaitzaren berri izatean, esan zuen ez zuela halakorik "espero"; baina segituan egin zion uko EBBko buru izaten jarraitzeari, jeltzaleen "batasunaren" izenean.

Estebanez gain, ondoko burukideek osatuko dute EBB berria: Joseba Diez Antxustegi, Andoni Busquet, Maitane Ipiñazar, Miren Martiarena, Ion Gambra, Javier Ollo, Markel Olano eta Manu Tejada. Lurraldeetako buruak izango dira, bestalde, Maria Eugenia Arrizabalaga (Gipuzko Buru Batzarra), Iñigo Ansola (Bizkai Buru Batzarra), Jone Berriozabal (Araba Buru Batzarra), Unai Hualde (Napar Buru Batzarra) eta Pantxoa Bimboire (Ipar Buru Batzarra).

Europar Batasunaren berrarmatzearen alde

Aurrez ere alderdiko hainbat ordezkarik egin bezala, Europar Batasunean berrarmatzeko ematen ari diren pausoak defendatu ditu Estebanek joan den asteburuan. Esan du, "AEBek multilateralismoa zanpatu" ostean, bi aukera dituela EBk: "indartzea edo desagertzea". Azpimarratu du "bitartekoek baldintzatutako peoi bat" izango dela EB, eta horrek bide egingo diela bai "dekadentzia politiko lasterrari", bai "erabateko dekadentzia ekonomikoari eta ongizate-estatuaren dekadentziari".