EHUko 100 irakasle eta ikerlari batu dira ikasle-mugimenduaren kriminalizazioaren kontra

AKTUALITATEA / Jazarpen politikoa

Zenbait irakasleren artikulu kriminalizatzaileari erantzunez, unibertsitatean pentsamendu kritikoa eta eskubide politikoak babestu behar direla aldarrikatu dute hainbat ikaslek idatzi baten bidez, eta unibertsitateko 100 irakaslek eta ikerlarik babestu dute aldarria. Hona hemen adierazpena eta sinatzaileen zerrenda.

EHUko 100 irakasle eta ikerlari batu dira ikasle-mugimenduaren kriminalizazioaren kontra

2026/03/26 09:28

GEDAR

Otsailaren 23an, ehunka ikasle mobilizatu ziren Euskal Herriko Unibertsitateko (EHU) Arabako campusean, Vox alderdiaren probokazio-prentsaurreko baten aurka. Horren harira, artikulu bat argitaratu zuten Vocenton EHUko hainbat irakaslek, ikasle-mugimendua kriminalizatuz eta EHUko errektoretzari eskatuz neurri gogorragoak har ditzala ikasle antolatuen kontra. Martxoaren 10ean, hortaz, EHUko ikasle andanak gaitzetsi zuen ikasle-mugimenduaren kontrako kriminalizazio-kanpaina, agerraldi jendetsu baten bidez; eta erreibindikazio berdinarekin egin dute berriki idatzi bat bi ikaslek, Uxue Lopezek eta Aimar Nuñezek. EHUko 100 irakaslek eta ikerlarik babestu dute adierazpena.

Hona hemen ikasleen adierazpena eta aldarriekin bat egin duten irakasleen eta ikerlarien zerrenda:

"Idatzi honen bitartez azken asteetan ikasle mugimendua jasaten ari den kriminalizazio kanpaina salatu eta unibertsitatean pentsamendu kritikoa eta eskubide politikoak babestu behar direla adierazi nahi dugu.

Izan ere, Voxen agerraldiak sortutako testuingurua probestuta, lehendabizi, eta Martxoaren 3ko mobilizazioena ondoren, EAJk eta eskuineko hainbat komunikabidek ikasle mugimenduaren aurkako kriminalizazio kanpaina handi bat jarri dute martxan. Horri guztiari, EHUko hainbat irakaslek publikatu zuten artikulua zein beste hainbat adierazpen gehitu behar zaizkio, zeinak, gezurrez eta gehiegikeriaz beteta egoteaz gain, eskuin muturraren markoa indartzen duten zuzen-zuzenean.

Zentzu horretan, alde batetik, adierazpen horiei nahiz EAJ sortzen ari den markoari erantzun nahi genioke eta, bestetik, sektore horietatik inposatu nahi duten unibertsitate eredu autoritarioaren aurrean, unibertsitatean eskubide politikoak eta pentsamendu kritikoa babestu behar direla aldarrikatu nahi genuke.

Voxen agerraldiaren harira hasi zen kriminalizazio kanpaina, istiluak egongo zirela esan baitzuten hainbat komunikabide eta politikarik, baina istiluak egotea interesatzen zitzaien bakarrak beraiek ziren. Kontrara, ehunka ikasle arazorik gabe mobilizatu ziren probokazio oro gaindituta.

Istilurik egon ez zenez, ondorengo astean (Martxoaren 3aren 50. urtemugaren bezperan) Gasteizko unibertsitatean egindako ekintza informatibo batetik eskandalu bat sortzen ahalegindu ziren, eta ondoren, martxoaren 3an ere istilurik egon ez zenez, kuota kriminalizatzailea asmatutako albisteekin betetzen ahalegindu ziren. Non jarri nahi dute eskubide politikoen aurkako debekuen langa alderdi eta komunikabide horiek? Testuinguru politikoa lokaztean interesatuta daude, ikasle mugimenduaren aurka eginez inolako eskrupulurik gabe eta egiari erreparatu gabe.

Bestalde, EHUko hainbat irakaslek ikasle mugimenduaren aurka egiteko artikulu bat publikatu zuten duela aste batzuk, eta artikulu horri beste hainbat adierazpen gehitu behar zaizkio. Horietan, adierazpen askatasunaren izenean, unibertsitatean ideia faxistak eta zapaltzaileak zabaltzea defendatu zuten; ustezko totalitarismoaren aurka campusa poliziaz betetzea justifikatu zuten, eta elkarbizitzaren izenean ehunka ikasleren kanporaketa exijitu zuten. Izan ere, horixe da diskurtso horren atzean dagoena: autoritarismoa eta militantziaren aurkako gorrotoa.

Gainera, horrelako adierazpenen bitartez marko arriskutsu bat ezarri nahian dabiltza, marko bat zeinaren arabera unibertsitate antifaxista bat antidemokratikoa den, unibertsitate antisionista bat antisemita den, eta unibertsitate euskaltzale bat baztertzailea den. Orain badirudi antifaxista, genozidioaren aurkakoa edota euskararen eskubideen aldekoa izatea intolerantea eta baztertzailea izatea dela.

Behin kriminalizazio kanpainari erantzunda, gure aburuz unibertsitatean babestu behar liratekeen puntuen inguruko hainbat adierazpen egin nahi genituzke. Egoera horren aurrean, beraz, ondorengoa aldarrikatzen dugu:

Batetik, ikasle mugimenduaren aurkako kriminalizazioa amaitzea exijitzen dugu. Bestetik, unibertsitatean pentsamendu kritikoa babestu eta eskubide politikoak defendatu behar ditugu: propaganda eskubidea, greba eskubidea... Eskubide horiek gabe autoritarismoa eta prekaritatea nagusituko lirateke. Amaitzeko, unibertsitateek gune askeak izan behar dute, eztabaidarako eta pentsamendu kritikoaren garapenerako espazioak. Hori bermatzeko ezinbestekoa da gorroto ideologiak ezabatzea. Gehiengoen eskubideak ukatzean oinarritzen den faxismoak unibertsitatetik kanpo egon behar du".

Uxue Lopez eta Aimar Nuñez

Idatzia babestu duten irakasle eta ikerlarietako batzuk: