CIE Recytec enpresak Legution (Araba) du lantegia, eta 60 langilek jarduten dute han. 2020an hasi ziren zuzendaritzarekin biltzen, lan-itun berri bat lortzeko asmoarekin, baina pandemiaren hasierak negoziazioak eten zituen. Izan ere, konfinamendu egoeran, aldi baterako enplegu-erregulazioko espediente bat (ABEE) aplikatu zuen zuzendaritzak.
Negoziazio-prozesua berrartu dute aurten, baina, ELA sindikaturen arabera, "enpresa ez dago prest KPIA modu kontsolidatuan emateko", ez eta lan-baldintzak hobetzeko ere. Langileen batzordearen arabera, beharginek "irabazien araberako planteamendua" aurkeztu zuten arren, zuzendaritzak errefusatu egin zuen.
Hala, enpresaren jarrera ikusita, greba mugagabera jotzea erabaki dute langileek. Lantegiaren aurrean elkarretaratzea egin zuten atzo eta, goizeko txandan, greba deialdiak %100eko babesa izan zuen beharginen aldetik.
