Joan den abenduaren 23an, Carabanchelen (Madril) dagoen luxuzko urbanizazio batean, Desokupación Legal enpresako faxistei aurre egin zieten hainbat pertsonak. Vivenio enpresa sustatzaileak kontratatu zituen desokupak, hamabost egun lehenagotik pisu batzuetan bizi ziren hainbat lagun etxegabetzeko. El Mundo-ren hitzetan, desokupazio-enpresako matoiak bertaratzean, dirua eskaini zieten bizilagunei, etxeak utzi eta alde egin zezaten. Hala ere, haiek gogor egin zieten kontra desokupei, eta liskar bortitzak izan ziren azkenean. Etxegabetzea geratzea eta matoiak botatzea lortu zuten, eta zauriturik amaitu zuen euretako batek.

Excelente kaleko 28 etxebizitzaren "makrookupazioari" buruzko polizia-ikerketari gehitu behar zaio abenduaren 23an gertatutakoa. Lehen ikerketen arabera, etxebizitza horiek, oraindik hutsik zeudenak eta Vivenioren jabetzakoak direnak, legez kanpo saldu zitzaizkien familia batzuei, 2.000-3.000 euroren truke. Bizilagunek diote iruzur baten biktima izan zirela, Internet bidez egindako transakzio batzuetan eta jantoki sozial batean izandako hitzorduetan engainatu baitzituzten.

Egoera horren aurrean, Viveniok alarmak jarri ditu etxebizitzen eremuan eta zenbait zona komunetarako sarbidea mugatu du. Bien bitartean, iruzurra jasan duten bizilagunek desokupen erasoak salatu dituzte, piperbeltz gasarekin egindako erasoak barne. Oraingoz ez dago atxiloturik, baina Espainiako Poliziak egoera ikertzen jarraitzen du.

Sistema 161 kolektiboak sare sozialetan jakinarazi duenez, Desokupación Legal da inplikatuta dagoen enpresa, Mytown Servicios Inmobiliarios SL izenez erregistratua dagoena (IFK zenbakia B8784227 da, eta Madrilgo de la Fuente kalean dauka egoitza). Bere garaian Bastión Frontal talde faxistako kideekin kolaboratzen zuen, eta administratzaile bakarra beste 40 enpresatan baino gehiagotan dago sartuta. Tetuango La Higuera Zentro Sozial Okupatua husten saiatu zen Desokupación Legal, baina faxistei aurka egin eta, antolatutako erresistentziaren bidez, desalojoa geratzea lortu zuten bertako kideek.